| Nummer:oub0929 | Datum:7. März 1474 | Overlevering:Editie | Vindplaats:Ostfriesisches Urkundenbuch, II, S. 30, nr. 929 |
Das Kloster Dykhusen überlässt auf Vermittelung des Propstes Johann Vredewold dem Pfarrer zu Grimersum das jetzt von Dove Peter und dessen Sohne Tis bewohnte Vorwerk auf Lebenszeit zum Niessbrauche.
Wy suster Lyawe priorisse, suster Elmeke subpriorissa, suster None unde Tateke unde alle de ghemene susters des convents toe Dickhusen, ordinis santi Dominici, [*] doen wytlick, kundich unde apenbaer allen eersamen erbaren vromen luden, de dessen breef zeen offte hoeren lesen, dat wy myt vryen willen unde walbedachten mode hebben toeghestaen unde staen toe jeghenwordich in unde myt kraft desses zodane vruntschap, als de eersame mester Johan Vredewolt, doctor, [*] provest toe Emden, unde de officiael van Vreeslant twisschen ons van der ene syde, [*] unde heer Tyarck, kerckheer toe Grymersum, van der ander syde, hebben ghemaket, welcke vruntschap in wyse [*] unde maneer hijrna bescreven, alsoe dat heer Tyarck vorscreven dewyle dat he levet sal toe synen besten willen bruken unde verhuren soedane vorwerck, daer Dove Peter plecht op toe woenen, unde Tis syn soen up wonet, de hure darvan up tho boeren yaerlix als onse convent plecht toe doende, unde vorder zo sal he na datum desses breves dre yaer lanck alle yaer hebben 10 Arensgulden van onsen convente in reden ghelde unbekummert. Beholden in dessen breve, wanneer her Tyarck afflyvich wert, dat zoedaene vorwerck vorscreven wedder sal toe onsen convente, unde soedaene breve als he daerup hefft sunder wedersprake syner unde syner vrunde, boeren unde ungheboeren, off yemandes van erer weghen, alle argelist; hulperede unde nye funde utghesecht. In oerkunde der waerheit zoe hebbe wy onse conventsinghesegel witlicken doen hanghen toe dessen breve. Na der boert Christi MoCCCCoLXXIIIIo, des maendaeges na Reminiscere.
