Gräfin Theda und Ritter Sibo verbünden sich mit den Häuptlingen von Jever, Goedens, Knyphausen und Inhausen zur Fehde gegen Graf Gerd von Oldenburg, und verabreden das Nähere wegen Unterhaltung der Söldner, Vertheilung der Gefangenen u. A. m.
Wy Thede, greffynne in Oistfreslant, Sybo van Dornum, ritter, to Ezense, Stestorpe unde Wytmunde hovetling, myt willen unser gude mannen semptlicken unde landen, bekennen openbair in und myt krafft desses breffs, dat wy uns myt den ersamen Edo Wymeken tho Jever, Eden Boyng to Goedensen, Lubben Onneken to Knypensen und Alleken tho Inehusen, hovetlinge, myt eren gudemannen und landen hebben voreynigt und vorbunden in desser nabescreven wijse: dat wy zamptliehen schullen und willen eyne veyde holden und voeren jegen hern Gerde, tho Oldenborgh greven, myt synen hulperen und tostenderen und oick myt synen hulpeshulpern, id syn Dudesschen effte Vresen, so dat nemant van unss allen schullen effte willen bisunderen myt hern Gerde erbenant und synen hulperen, id syn Dudesschen effte Vresen, affzonen eder jenige dage holden; und wes dessen geschen schall, dat schall wesen und geschen myt willen und wetenheyt unser parthe vorser. in beyden syden. Oick were et zake, dat jenrand van uns vorser. parthen knechten effte volckes bederff weren de eyne deme anderen tho hulpe to zenden, so schullen dejenne, de de knechte und dat volck uthsendene, den knechten de soldye geven und denjennen, den de knechte und dat volck gesant werden, de schullen dat volck unde de knechte myt kost und beer bisorgen. Oick were sake dat jemand van uns vorscr. parthen in desser veyde konde offte mochte uns hulpe erkrigen jegen hern Gerde upbenant und synen medehulperen, van heran, steden, gudemannen unde landen, dat schal scheen und wesen myt willen und vulborde unser erbenanten parthen in beyden zyden; und iss et zake, dat unser eyn deme anderen so vorscr. is, volck und knechte to hulpe schickede, und offte dar wes gewunnen worde, so schall dat gewyn vortgan na geborlicheit; und wer sake, dat jemant van den knechten und volcke vangen grepen, so schullen de vangen geantwordet werden denjennen, de dat volck und knechte heben uthgesand, und offte jemand van unss beyden parthen thovoeren myt vangen were, so schullen und willen unser eyn deme anderen myt jegeners tho hulpe komen. Oick so en sall nemand van uns vorben. parthen tho beyden syden bisunderen veyde tho water offte lande maken eder roven, dewyle desse veyde durende is, id en sy myt willen offte vulbort unser vorben. parthen in beyden halven. Alle desse vorscr. articulen, stucke und sake loven wy Thede in Oistfresland greffynne, Sybo van Dornum ritter, myt willen unser gudemannen, stede, vast und unvorbroken sunder jenigerleyge argelist und nyge geverde to holdene. In orkunde der warheit heben wy Thede greffynne und Sybo van Dornum ritter vor uns, unse gudemans und landen unser beyder ingesegel wytlichen beneden heten hangen an dessen contracte effte breff. Gegeven na Christi gebort verteynhundert, dairna in deme dreentzeventichsten jaren, ame dinxedage neist na alder Godes hilgern dage.
x
| Edities |
E. Friedländer, Ostfriesisches Urkundenbuch II (Emden 1881), nr. 920 |
