Der Kustos des Minoritenordens in Friesland nimmt Heinrich Mathie und dessen Frau Geseke in die Gebetsgemeinschaft auf und ernennt beide zu Prokuratoren des Klosters Faldern in Emden.
Christo Deo devoto Henrico Mathie ac Geske, eius consorti, frater Henricus, fratrum minorum per custodiam Frisie custos et servus, salutem et pacem in Domino sempiternam. Quamvis ex caritatis debito omnibus teneamur, illis tamen longe amplius obligamur, quorum dilectionem certis beneficiorum indiciis frequencius experimur. Vestre itaque devocionis sinceritatem attendens, quam ad nostrum et seraphici patris nostri sancti Francisci ordinem geritis, uti veridica fratrum relacione cognovi, affectum sincere caritatis acceptans ac dilectioni vestre vicissitudinem rependere cupiens salutarem, autoritate reverendi patris nostri ministri, qua fungor in hac parte, ad confraternitatem nostram et universa et singula nostre provincie suffragia vos recipio tam in morte quam in vita, plenam vobis missarum, oracionum, officiorum, predicacionum, ieiuniorum, elemosinarum, peregrinacionum, disciplinarum, vigiliarum, abstinenciarum, [*] devocionum et omnium bonorum participacionem tenore presencium concedendo, que per fratres nostros et sorores ordinis sancte Clare, per nostram provinciam degentes, operari et acceptare dignabitur clemencia Salvatoris. Insuper ob singularem devocionis fervorem, quem ad nostrum predictum ordinem et eius restitutorem Christi signiferum sanctum patrem Franciscum geritis, vos in procuratorem et procuratricem conventus Phalrensis recipio, volens vos gaudere privilegiis et libertatibus, quibus tales procuratores a sede apostolica largiflue sunt suffulti, scilicet, quod tempore interdicti interesse poteritis divinis, dummodo excommunicati non fueritis, nec causam dederitis interdicto. Datum anno MoCCCCoLXVIIo, ipso die sancti Severini episcopi.
x
| Edities |
E. Friedländer, Ostfriesisches Urkundenbuch I (Emden 1878), nr. 856 |
