| Nummer:oub0790 | Datum:Neustadt, 14. Juni 1463 | Overlevering:Editie | Vindplaats:Ostfriesisches Urkundenbuch, I, S. 685, nr. 790 |
Kaiser Friedrich erhebt den Häuptling Ulrich zu Norden und seine eheliche Descendenz zu Grafen von Norden, gewährt ihm das Recht, mit rothem Wachse zu siegeln, und trägt die nunmehrige Grafschaft Norden dem Ulrich zu Lehen auf.
Wir Friderich von Gottes gnaden Roemischer keyser, zu allenn zeitten merer des reichs, zu Hungern, Dalmatien, Croacien etc. kunig, hertzog so Osterreich, zu Steyr, zu Kerndten und zu Crain, herre auf der Windischenmarch und zu Porttenawe, grave zu Habspurg, zu Tirol, zu Phyrtt und zu Kyburg, marggrave zu Burgaw und lanndgrave in Ellsass, bekennen und tun kunt offennlich mit disem briefe allen den, die in sehen oder horen lesen, wiewol wir von der hohe keyserlicher wirdikeit, darzu wir durch schickung des allmechtigen Gottes zu dem heiligen Romischen reiche loblich gecronet, des ein merer genant werden, und insonderheit geneigt sein, denen, die uns und dem heiligen reiche die burde und sorgveltikeit desselben reichs getreulich helffen tragen, umb solch ir verdinen, ir lobe und ere zu praitten und sy durch begabunge unserer keyserlichen majestatt mit zirde des adels, irer persone und stamens zu wirdigen, so haben wir doch insonnderheit angesehen und betrachtet solch erberkeit, redlicheit, vernufft und tugend, damit der edel unser und des reichs lieber getrewer Ulrich, heubtling zu Norden, vor unserer keyserlichen majestatt berumet ist, und auch die annemen, getrewen dinste, die er uns und dem reiche offt und dick getan hat, und furbas in kunftigen zeitten wol tun mag und sol, und haben darumb mit wolbedachtem mutte, guttem ratte unserer und des reichs fursten, graven, edeln und getrewen und rechter wissen, des benanten Ulrichen heubtling wonung und wesen genant Norden zu einer graveschafft des heiligen reichs auss Romischer keyserlicher machtvolkomenheit erhebt und gemachet, und denselben Ulrichen und alle sein eelich leibserben fur und fur darauf gegrefet und und zu grasen und grefin unser und des heiligen reines geschepfet, gesetzet, gewirdiget, gemachet und erhebt, schepfen, setzen, wirdigen, machen und erheben sy also zu unsern und des und zu graven und grefin unser und des heiligen reichs geschepfet, gesetzet, gewirdiget, gemachet und erhebt, schepfen, setzen, wirdigen, machen und erheben sy also zu unsern und des heiligen reichs graven und grefin von Romischer keyserlicher macht wissentlich in crafft diss briefs, also daz sy sich zu hinfur ewiclich grafen und grefin zu Norden schreiben, nennen und von meniclich also genant sollen werden; auch alle und yeglich recht, wirdikeit, freyheit, gewonheit und vorteil inner und ausser gerichtes an allen ennden haben, geprauchen und geniessen sollen und mogen, der annder unser und des heiligen reichs graven und grefin von recht oder gewonheit haben, geniessen und geprauchen, und daz auch der vorgenant graff Ulrich und sein eelich leibserben fur und fur nu hinfur zu ewigen zeitten alle und yeglich ir offenn und beslossen briefe mit rottem wachs versigeln und verpettschatten und sich des zu allen eren zieren und wirden auch geprauchen und geniessen sollen und mogen von allermeniclich ungehindert. Es sol auch der obgenant graff Ulrich und sein eelich leibserben fur und fur die egemelt graveschafft Norden nu hinfur, als offt sich das gepuren wirdet, von uns und unsern nachkomen am reiche, Romischen keysern und kunigen, als des heiligen reichs lehen erkennen und empfahen, doch uns und dem heiligen reiche an unserer oberkeit, gewaltsam und gerechtikeit und sust meniclich an seinen rechten unvergriffenlich und unschedlich. Der offtgenant Ulrich, grave zu Norden, sol auch darauf dem edeln Hannsen freyen zu Newnburg auf dem Ine und herren zu Rorbach unserm ratte und des reichs lieben getrewen oder wem er das an seiner statt bevelhen an unserer statt und in unserm namen, wan derselb graff Ulrich darumb ermont windet, von solcher lehen wegen gewondlich gelubde und eide tun, uns und dem reiche davon getrew, gehorsam und gewerttig zu sein und ze tunde, als siche das von solcher lehen wegen ze tude gepurtt ungeverlich. Und wir gepietten darumb allen und yeglichen fursten, geistlichen und werntlichen, graven, freyen, herren, rittern, knechten, haupttlutten, amptlutten, vogtten, pflegern, verwesern, burgermeistern, richttern, retten, kunigen der wappen, erhalden, persevanden, burgern und gemeinden und sust allen anndern unsern und des reichs undertanen und getrewen, in was wirden, stattes oder wesens die sein, von Romischer keyserlicher macht ernstlich und vessticlich mit disem briefe, daz sy den obgenanten Ulrichen, graven zu Norden, und sein eelich leibserben fur und fur nu hinfur graven und grefin zu Norden nennen und dafur hallten, sy auch daran und den bemelten unsern gnaden, rechten, eren, wirden, begabungen und freyheitten nicht hindern oder irren in dhein weise, sonnder sy der in vorgeschribner masse gerulich geprauchen und geniessen lassen, als lieb einem yeglichen sey unser und des reichs swere ungnade zu vermeiden, und darzu ein peen, nemlich funffezigk marck lotiges goldes, die ein yeglicher, als offt er frevenlich dawider tette, verfallen sein sol, halbe in unser und des reichs camer und den anndern halben teile dem egenanten graff Ulrichen und seinen eelichen leibserben fur und fur unablesslich zu bezalen. Mit urkunt diss briefs besigelt mit unserm keiserlichen majestatt anhangnndem insigel. Geben zu der Newenstatt, ame eritag vor sannt Veittstage, nach Cristi gepurde viertzehenhundert und ime drew und sechtzigisten, unserer reiche des Romischen ime vier und zwaintzigisten, des keyserthumbs ime zwelfften, und des Hungrischen in dem funfften jarenn.
Ad mandatum domini imperatoris in consilio.
Ad mandatum domini imperatoris in consilio.
