| Nummer:oub0779 | Datum:11. März 1462 | Overlevering:Editie | Vindplaats:Ostfriesisches Urkundenbuch, I, S. 678, nr. 779 |
Bürgermeister und Rath von Hamburg bitten die Häuptlinge Lubbo Onken zu Knyphausen und Sirk zur Friedeburg, die gefangenen Rendsburger bis zum 25. Juli frei zu geben.
Juw erbarn wisen mannen Lubben Onneken to Knipenze unde Tzirke tor Fredeborg, hovetlinghen, unssen guden vrunden doen wy borgermeistere unde radmanne to Hamborg neghest vruntlikeme grute weten, dat wy van vromen luden sin anghefallen unde beden, dat wy den armen luden van Rendesborg, de gy in vengnissen holden, behelpen und by juw bearbeiden wolden, dat se to ener tid doch hebben mochten. Beghern darum vruntliken, gy Jurien Glusinghe, Clawese Tilere unde Herdere, sineme knechte, der vengnisse dach gheven willen bette to sunte Jacobesdage[*] schirstkomende; wy willen juw dar gud vor wesen, wo se binnen der tid nicht vruntliken van juw scheden, dat se, so verne se in levende sin, up sunte Jacobesdach na ghifte dessen breves erstkomende wedder inkomen scholen, dar wy juw vor loven mit craft dessen breves. Willet uns desses nicht weigheren, dat willen wy gerne vorschulden. To opembarer tuchnisse hebben wy unser stad secrete torugghe heten drucken up dessen bref. Na der bord Cristi verteinhundert jar, darna in deme twe unde sostighesten jare, des donredaghes vor Reminiscere.
