| Nummer:oub0771 | Datum:12. Juli 1461 | Overlevering:Editie | Vindplaats:Ostfriesisches Urkundenbuch, I, S. 667, nr. 771 |
Häuptling Sibo von Dornum usw. vergleicht sich mit dem Häuptling Tanno Duren zu Jever über die Herrlichkeit Wittmund in der Weise, dass er seinem Sohne Wibet, welcher Tanno's Tochter Tiadere heirathen will, und deren Erben sein Recht an Wittmund überträgt.
Ick Sybo tho Dornum, Esensen, Stestorp unde Wyttmunde hovetlingh, enkenne openbare vor allen erbaren guden luden, de dessen breff zeen edder horen lesen, dat ick my lefliken unde gutliken hebbe vorenyghet unde vorsonet tho ewyghen tyden in desser nabescreven wyse, alse umme de herlycheyd, rechtycheid unde ock ervegodere tho Wythmunde myt deme ersamen Tannen Duren tho Jevere, Rustringhen etc. hovetlingh, in bywesende des hochghetreuweden juncheren Olrikes, tho Gretsiil, Norden, Aurike, Emden, Berum etc. in Oestvresland hovetlingh, unde der erbaren heren meyster Tyaden tho Aurike unde heren Alberde tho Hagen, kercheren, unde ok der ersamen Eden Boynghes tho Godensen, Syrick tor Vredeborch unde Alken tho Innehusen, hovetlinghes, so dat ick hebbe ghelavet unde thogesecht, lave unde thosegghe yegenwardich in unde myt desseme breve Wybeth mynen sone, Tyaderen, des ergenanten Tannen dochteren, tho eyneme echten husheren unde geve eme mede tho brutscatte alle myne herlycheyd, rechtycheid unde ervegodere, dat my in deme ampte tho Wythmunde boren mach, unde uft yd ghevelle, dat de vorbenomde Wybeth myn sone, edder Tyadere, dat God vorbedde, erer eyn edder samptliken vorvellen van dodes wegene unde van en neyne kindere nableven, so scal des ergenanten Tannen herlycheyd, rechtycheyd unde ok ervegodere in deme ampte tho Wythmunde gheervet werden in syne edder syner erven unde nakomelinghe besyttinghe, unde uft de ergenomde Tanne edder syne erven myt my uft mynen erven deshalven worden twydrachtych, so scolen de ergenomde Tanne unde syne erven, ick unde myne erven darby varen na inholde unde vorlude des vorbundes tho Aurike wandaghes vorramet unde vorsegelt sunder unsser beyder weddersproke. Alle desse vorscr. stucke samptliken unde eyn itlick bysunderen, rede unde lave ick Sybo hovetlingh vorbenomed vor my unde myne erven stede, vast, unvorbroken tho holdende sunder yenygherleye arghelist, hulperede, nye funde unde bosen wan, unde hebbe des tho eyner orkunde unde wytlycheyd myn inghesegel hanghen heten benedden tho dessem breve. Datum anno Domini MoCCCCoLXo primo, priori die Margarete virginis.
