| Nummer:oub0766 | Datum:3. Febr. 1461 | Overlevering:Editie | Vindplaats:Ostfriesisches Urkundenbuch, I, S. 663, nr. 766 |
Mert Sippena zu Woltzeten verkauft dem Propste zu Groothusen 6 Grase Landes im Hamswehrumer Hammrich.
Ic Mert Sippena to Waltzeten bekenne voer alle eersamen gueden luden, dat ic mit vrien wille volberadens mode unde[*] consent mynre huysvrouvven heb vercoft deme eersamen heer provest unde kercheer to Husum vries, stedes, erflikes copes 6 grase landes, belegen inna Hamswere hamrick bi deme dyken, gheheten Hingafen, bi da Scepewey, voer ene summe geldes, den my den yersten penninck mit den lesten degher unde wael na mynen willen is betalet, des ic hem dancke unde levere hem datselve voerscr. erve vrii ende quitt voer alle aensprake to ewigen tiiden sonder ennigerleye behelpinge geestelick edder weerlikes rechtes, unde deselve heer Ubbo voerscr. mach ditselve erve vrii ende veylich bruken, vercopen, voergheven unde syne rechte erven (vorterven) sonder alle argelist. In meerre bekantnisse des voerscr. eerfliken kopes unde goeder betalinge heb ic Mert voerscr. beden den vromen luden lauer Wydzald, kerckhere, unde Heero Ebbana to Waltzeten, dat se hore seghelen hebben witliken hangen an dussen brief in yeghenwoerdicheyt der vromen luden Udo to Husum, Frello Dulena unde ander guede lude als rechte tugheslude daerto gheropen. Datum int jaer ons Heeren MoCCCCo unde LXIo, na Purificacionis.[*]
