| Nummer:oub0757 | Datum:18. März 1460 | Overlevering:Editie | Vindplaats:Ostfriesisches Urkundenbuch, I, S. 654, nr. 757 |
Häuptling Sirk zur Friedeburg bekundet mit Bremen eine Tagfahrt in Butjadingerland halten zu wollen, um seine Streitigkeiten mit Helmerich von Fikensolt beizulegen, und spricht aus, dass bis dahin die beiderseitigen Kaufleute und Unterthanen freien Handel und Wandel haben sollen.
Ik Siriik tor Vredeborch unde Repzolte etc. hovetling bekenne unde betughe apenbare in dessen breve vor alsweme de ene zeen edder horen lezen, dat ik inyt deme ersamen borghemesteren unde raed, meenheyt der stat van Bremen een vruntliik bestant hebbe anghenamen twischen nu unde 4 weken na Paeschen negestkamende na datum dessen breves unvorbraken to holdende van sodanes unwillen weghen, den ik myt Helmerde van Fikensolte hebbe van myns gheldes weghen, unde bynnen dessen vorscreven veer weken enen vruntliken velighen dach to vorramende in Butjiaden, wen ik deme ersamen rade vorscr. 14 daghe tovoren scrive, dar uns dat van beyden parten beqwemest is unde in gheleide vorwared syn, unde den to besinde; were Helmerck unde ik dar tor dachstede uns icht vruntliken vorliken unde scheden laten kunnen, aver dem de ersame raed vorscr. were begheren lengher daghe an to nemende eff wy uns den up deme daghe nycht vorenyghen unde vorliken konnen, zo wil ik umme bede willen der ersamen vorsichtighen Tannen unde Alleken, to Jever unde Inhusen hovetlinge, den dach upscutten wente to sunte Johans daghe to mytsamer negest kamende. Hiirup schal unser beyder coepman unde undersaten desse vorscr. tiid lanck in unde dorch unser beyder bede varen, kamen, keren unde vorkeren, al dat de vorscreven unwille ok upp deme daghe vorben. vruntliken nycht affghedaen en worde sunder alle behael unde arghelist, in deme ik Siriik vorscr. zodanen breeff in desser manere mach wedderumme werden van deme ersamen rade vorscr. Des to tughe unde enen mereren warheyt hebbe ik Siriik vorscr. heten druckken myn ingesegel up spacium dessen brivis, de de is screven des dinxstedages vor Letare in deme LX.
