| Nummer:oub0718 | Datum:1457 | Overlevering:Editie | Vindplaats:Ostfriesisches Urkundenbuch, I, S. 626, nr. 718 |
Dieselben urkunden über die Uebereinkunft mit ihrem Oheim Aild Beninga wegen der Erbgüter im Cirkwerumer und Westerhuser Hammrich, wegen des Osterhuser Heerdes und anderer Erbgüter.
Wytlyck unde kundych zyd allen erbaren luden, de dessen breff zeen edder horen lezen, wo wy Haro unde Ayld, broders tho Hynte, hebben eyn schedynghe ghemaket tuschen Ayld, provest tho Grimersum unde hoftlyngh to Hynte, zo dat he wedder schal hebben de erve, de gheleghen zynt in Syrckwere[*] hamryck, unde vortan in Westerhuser hamryck, alzo bename Gherdes ham 19 grase ende 2 graze darby, unde Thryarscher 19 grase; ende in Kanynre hamryck 21 grase. Dyt erve ys van Oesterhusen hert keghen dyt vorscr. erve unde breff gherekent, alzo dat eyn uet den anderen ghesneden ys. Ock zo gheven wy Haro unde Ayld, broders to Hynte, Aylde, unsen oem, hofftlyng to Grimersum, de erve to Wyrdum unde to Grimersum van uns Haro unde Ayld, broders, van uns oldemoder erve, unde to Fysckwert, unde to Pewessum to Osterhusen hert hebben em ghegheven, unde schelden hem vrii unde quyt vor Lherlter halve hert unde erve, in der hamryck gheleghen to Lherlte, vor uns unde unse erven, zo dat Ayld vorscreven dyt vorscr. erve mach bruken, bezytten unde zynen erven to erven vor uns Haro unde Ayld vorscreven. In eyn oerkunde desser warheyt, zo zynt desses breves twe van eyner hant ghescreven unde de eyne uet den anderen ghesneden etc.
