| Nummer:oub0715a | Datum:Aurich, 28. Juni 1422 | Overlevering:Editie | Vindplaats:Ostfriesisches Urkundenbuch, I, S. 623, nr. 715 |
Vergleich zwischen Helmerich Taleken und Johann Borcharts über Gebbeken Hermens und Borchart to Aurik Testament.
Ik her Hinrik, kercher to Aurike, bekenne openbar vor allen luden an desseme breve, dat vor my in gheschen ene vorgadderinge ener echtscopp myd vorworden twischen Gebbeken Hermansen unde Borcharde in desser wise nabescreven: in erste, dat Gebbeke beschedede erer dochter Elzeken eres vader gued, zaligen Hermans vorscr., unde na ereme dode ere kledere unde klenode, dat to ereme live hort, myd enen bedde, myd aller tobehoringe neyst deme besten, so verre dat de vorscr. twe nene ander erve myd malkanderen kreghen, unde dar dat schude, so scholden de erven to Gebbeken gude unde klenode to liker schicht gaen myd erer dochter vorscr.; unde off Ghebbeke storve sunder erven van Borcharde, so scholde ere dochter. vorscr. ere halve gued hebben, unde Borchard de ander helffte to liken dele. Ok so beschedede zee unde gaff eres broder dochter Ghebbeken verlich lichte gulden uth ereme gude, ok ufft er dochter vorscr. er storve dan zee, zoe mochte Gebbeke dat vorben. anvallende gued van erer dochter geven unde laten in Godes ere vor dat zee wolde unbesproken. Ok off Borchard er Gebbeken storve, zoe zolde ze zyn allinge gued besitten sunder jenigerleie ansprake al siner vrunde, uthgesproken wath he in Godes ere keren wolde. Desgelikes mach Gebbeke ok doen. Unde desse vorworde unde articlen syn geschen unde gedegedinget to Aurike in der kerken. Daranne und over was her Egbert, capellan to der tyd, unde Hinrik Brunswyck. To ener mereren kentnisse, so hebbe ick her Hinrik umme bede willen to beiden ziiden myn ingesegel an dessen breff ghehangen. Datum anno Domini MoCCCCoXXIIo, in vigilia apostolorum Petri et Pauli.
