| Nummer:oub0699 | Datum:6. März 1456 | Overlevering:Editie | Vindplaats:Ostfriesisches Urkundenbuch, I, S. 612, nr. 699 |
Der Komthur Heuwo zu Jemgum bekundet im Einvernehmen mit dem Kellner und dem Hofmeister daselbst und dem Hofmeister des Vorwerks zu Holtgast, dass Heelpo aus Weenermoor und dessen Frau Sippe in das Kloster aufgenommen seien und all ihr Hab und Gut, mit Ausnahme von 7 Ackern Erbgutes bei Weenermoor, welche erst nach ihrem Tode anfallen sollen, demselben geschenkt haben.
Witlyk unde kundich ziit al den ghenen, de dessen breff zeet offte hoeret lesen, dat ick her Heuwe, commenduer to Gemgum, myt willen unde vulboert Uffeken unses kelners, broder Folkerdes, des hoffmesters to deme cloestere, unde broder Thyans, hoffmesters up der Holtgast unses vorwerkes, unde myt wyllen unde rade alle unser broder, hebbe anghenomen den beschedenen man Heelpen up den Wenyngmoer vor eynen broder unses orden sancti Johannis myt zyner erlyken echten husvrowen Syppe gheheten myt zodanen vorwoerden unde bescheyde, dat Heelpe unde Syppe vorghescr. overgevet unde updreghet myt gueden willen unde vorberadenen mode Gode almechtich tovoren umme salicheit erer zelen unde erer levesten vrunde, darneghest der reynen maghet Marien, sunte Johanni baptisten unde alle Godes hillighen, to nuttycheit des conventus to Gemgum, al ere guet, replik unde unreplik, wat dat jo sy unde waer dat zii, byhalven, uotghesproken unde butenbyscheden zeven ackere erffgodere offte landes, byleghen to den Wenynghermoer, ynne Ghaerbadaheerna gheheten, unde datzulve, dat dar meer boven yn den mora byleghen ys, vor eghen guet, dat ere tovallen mochte to dele, to eren levende to willen to brukene unbestraffet. Weret ock zake, dat Sippe erghescr. storve vor eren echten manne Heelpen vorg., scholde Heelpe erghescr. dessulven erves offte landes vortan brukende wesen to synen willen unde to synen lyve. Unde na erer beyder dode scholde yt blyven yn de ere Godes by deme cloestere to Gemgum to ewighen tiiden, dat en were sake, dat Heelpen offte Syppen vrunde dar wat van kopen wolden myt willen unde vulboert erer beyde unde redelikes kopes; unde darto zo hefft Heelpe myt Syppen syner huesvrowen affbyscheden alle arbeit unde werck des conventus to Gemgum offte buten den convente, dar men eme byswaren mede mochte. Unde Syppe erscr. mach de professien des orden doen sancti Johannis unde dat cruce untfaen, wanneer ere begheerte darto is. Alle arghelist unde nye vunde uetghesproken. Unde aller articulen unde stucke, als vorghescreven steyt, to merer betuechnisse unde wytlycheit wyllen, zo hebbe ik her Heuwe commendur erghescreven, myt vulbort unde willen alle unser broder, dat inghezeghel unses conventus unde myn eghene zeghel ghehanghen an dessen breeff. Anno Domini MoCCCCoLVIo, septima feria ante Letare, dominicam quadragesimalem.[*][*]
