Häuptling Ulrich bestätigt das nach Emsiger Landrecht ergangene freisprechende Urtheil der Landrichter Erd und Beno in Sachen des Schiffsbauers Claus gegen Johann Starke, welcher, wie Claus angiebt, durch unvorsichtiges Umgehen mit einem Topfe Theer einen Hausbrand verschuldet haben soll.
Wy Olrick to Gretsyl, Norden, Aurike, Emden, Berum etc. in Oestvresland hovetling, enkennen unde bringen openbar an desseme breve vor allen ersamen vromen luden, de ene zen, horen offte lesen, unde alswerne, dat vor uns ghewesen ys Clawes, schutenmaker, borger to Emden, klagende up Johann Starke, Hermens zone, ok to Emden borger wonachtich, van seker schaden unde vorluste, de van eneme pot teres was vorheven unde gescheen in husbrande, over dat Johan sines zulves schipp scolde teren laten, welker pot Johan vorscr. dar ene Clawes eme zulven zetten heth, ghesath unde gebrocht hadde, dardoe de brand unde schade van vorresen was, so dat de vorben. Johan an unse jegenwordicheit myd sinen antworde to dessen vorgerorden klaghe tonede unde wisede ene besegelde rechtschedinge van jungen Erde to Tordingum unde Eno (so)[*] to Petkum, domdeleren, na lantrechte an jegenwordicheit der ersamen heren Johann Gerwer unde heren Andres Gronenberch, radheren to Hamborch, de tor tyd to Emden vorwarer, twischen de vorscr. parte ghedelet unde uthgesproken, na uthwisinge Emsinge lantrechtes, aldus inholdene unde ludene nabescreven, dat Johan vorben. myd twen warachtigen tughen to zyck sulven bewisen unde tughen scholde, dat Clawes eme den pot myd tere hedde zetten heten, dar hee ene ghebrocht unde gesath hadde. Scholde denne unde mochte Johan unde de syne des geneten unde myd rechte der ansprake unde klage gensliken entslagen wesen; welke tughe unde bewiis de upgenante Johan, nameliken Swarte Arnde unde Detmer Becker int richte, so eme toghevunden was, ghebracht hadde, zulke tuchnisse to donde overbodich zyck wisende, dat Albert Tidkens, Hans van Winsen unde Johan van Duten aldus vor uns Olrike vorben. by erer warheit hebben bekant wesen unde toghestan, deme zoe schen zii, welke tuchnisse Clawes nicht entfangen wolde, alze id eme doch an rechte toghedelet was; worumme Erd unde Beno domdeler vorscreven vorliken unde na inholt Emsinge lantrechtes den vorben. Johann unde sine erven der ansprake van Clawese unde sinen erven quiit, ledich unde los eweliken mer sunder ansprake darvan to wesende unde to blivende ghewiset unde gheschulden hadden unde hebben. Daranne unde over hebben gewesen Johan van Duten, Engelke Kremer unde Jacob Scroder unde veler vromer lude genoch. Welke schedinge vorgerort wii Olrick erben. confirmeren, vortsetten unde sterken jegenwordich in unde myd crafft desses breffs eweliken sunder intoch off hulperede so to holdene unde tho blivende, so dat wy ok hiirto Johann unde sine medebescrevene der ansprake quiit, ledich unde los to wesende van Clawes off jemende ghewiset unde gheschulden hebben, worumme Clawes eder sine erven in tokomenden tiden hiirvan nummermer up Johann unde de syne myd rechte mer klagen mach eder schal. Des wii Olrick vorben. unse seghel umme bede willen to merer kentnisse witliken to desseme breve hebben hangen heten, unde wii Albert Tidkens, Hans van Winsen, Johan van Duten unde Meyo Tyadmersna, nu tor tiid borgermester to Emden, hebben desses ok tor kentnisse unser witlicheit unde um der bewisinge der stad Emden seghel umme Johansen vorbenompt bede willen by unses gnedigen juncheren Olrikes segel witliken to desseme breve heten hangen, de screven unde na der gebort unses Heren ghegeven in dusent veerhundert, darna an deme vyff unde vifftigesten jare, ame achteden daghe unser leven Vrouwen assumptionis.
x
| Fonds |
Ostfriesisches Urkundenbuch, I |
| Fol.nr. |
S. 606 |
| Nr |
691 |
| Olim |
Orig. im Rathsarchive zu Emden. — Reg. in Msc. Fol. 92 der landschaftlichen Bibliothek. |
| Jaar |
1455 |
| Datumcode |
oAssMar |
x
| Edities |
E. Friedländer, Ostfriesisches Urkundenbuch I (Emden 1878), nr. 691 |
