| Nummer:oub0688 | Datum:25./31. Mai 1455 | Overlevering:Editie | Vindplaats:Ostfriesisches Urkundenbuch, I, S. 602, nr. 688 |
Die Häuptlinge Imelo von Osterhusen und Haro und Aild von Hinte vertragen sich wegen der Heerde zu Osterhusen und Larrelt, der Burg zu Hinte und mehrerer werthvoller Geschmeide.
Wytlick kundich siit allen ersamen goden luden, de dussen breeff seen edder horen lesen, wo dat ick Imelo hofflynck to Oesterhusen unde Hynte etc. hebbe ghemaket ene schedynghe by myner consciencien unde myt goder lude rade tuschen Haren unde Ayld, broders unde hovetlyngen tho Hynte, unde my Imelo vorscr. van erve unde werve unde gode, golt unde sulver, daer wy twydrachtich um ghewesen hebben. Item int eerst, so sullen se broders hebben unde delen alle dat erve unde werve halff, dat daer is nu ter tiit tho Oesterhusen heert unde Hlerleter heert thegen my Imelen vorscr., waer dat it gheleghen sy. Item oeck so sullen se broders hebben unde bruken de borch to Hynte nae oeren besten, behalven de achtende part van der borch, den sollen se my off mynen erven vornoghen tho goder lude segghen. Oeck so sullen se hebben van my Imelo mynes vaders unde mynes moders erve de helffte. Des so heefft Fredrick saligher dachnisse mynes vaders unde moders golt unde sulver beholden unde ghebruket tot synen besten, daer scholen se broders my Imelo gheven vor miin deel ses styghe Arrensche gulden, 15 krumstert tho rekenen vor den gulden. Oeck so scholen se broders my Imelo vry maken salighe Hymben span, daer se my gheervet heefft, des soe heefft salighe Frederick untfanghen enen rynck van salighe Hymben golde, de ghewerdert in up 3 1/2 stighe Ar. gulden, unde enen sulveren gordel, den Lyuwert em brachte. Item so heefft Frederick vorscr. van my Imelo ghekofft van dussen vorscr. golde eyn sulver stukelbant vorgult und een halsbant vorgult, de ghewerdert synt up achte unde vyfftich Postelaten gulden, daer de helffte van tachter is. Item so heefft Fredryck saligher dachtnisse untfanghen van Evert Syckynghe viiff stighe Ar. gulden, daer ick Imelo nycht enen pennynck van en hebbe, daer miin breeff unde segel voer steyt. Item umme dusse vorscr. erve unde gode synt vorkofft dre punt goldes, de Broeckmer hilligen thoehoert, daer wy beyde parte schuldich synt tho betalen.[*] Dusse vorscr. punte unde articule wyl ick Imelo vorscr. holden by salicheit myner selen unde wyl hiirop sterven, dat dat waer is unde rechtvordich ghemaket, als vorscr. steet. In orkunt dusser waerheit so synt dusser breve twe, de ene ut deme anderen ghesneden unde myt ener hant ghescreven. Anno Domini Mo CCCCoLVo, in der Pynxter weken etc.
