Bürgermeister und Rath von Groningen entscheiden einen wegen eines von Junker Ulrich zu Rotterdam gekauften und von Rotterdamer Kaufleuten mit Beschlag belegten Schiffes zwischen ihm und Holland, Seeland und Friesland entstehenden Streit, indem sie dem Junker Entschädigung zusprechen, und vereinbaren unter Strafandrohung andere Vertragspunkte, die beobachtet werden sollen.

Wy borgermestere ende raed der stad von Groningen doen kundich allen luden, want zekere twydrachten ende schelingen gheresen sin ende upgestaen tusschen den ersamen juncker Olricke to Grietzyll, Norden, Aurike, Emden, Berum etc, hoefftlingk in Oestvriesland ende sinen hulperen ende ondersaten an die ene ziid, ende den van Holland, Zeeland ende Vriesland ende oeren hulperen ende ondersaten an die ander ziid, risende ende tokomende Vall enes hulkes wegen, die tot Rotterdam in Holland by Johan Pauwelssen onsen borger gehofft solde wesen tot des voerscr. juncker Olricks behoeff, ende daer hie by sinen zendeboden wulmachtiget zeget em up betaelt te hebben ene kennelike summe van gelde, dyt nicht tegenstaende, soe hebben die koepluude van Rotterdam beyde schip ende gelt beholden, also wy daervan sint bericht. Omme welke schelingen ende twydrachten neder te loggen by consente, wille ende wulborde beyder vorscr. parten, die sake daervan an ons alinge ende all by enen compromisse tot eenre utsprake nae rechte offte mynnen gebleven sint ende hebben em onser utspraken gansliken belovet, wy die de komenscapp altyt gheerne zien solden oeren loep te hebben, ende omme doetslage, roverye, bloetstortinge ende anders, die van dessen verrysen mogen, alinge in rechter vrentscapp te verhoeden ende neder te leggen, so seggen wy tegenwordich daervan myt gueden vorbedachten raede ende voersenicheyt tusschen beyden parten ende dielen voerscr., ock oerer beyder hulpere ende ondersaten ende hulpershulper, ene ewyge stede vaste ende onverbroken zoene ende vrede, die in gheenre maniren te breken, men by eenre penen an beyden ziiden geholden te worden van driedusent Rinssche gulden.
In den ersten so is onse zeggen ende utsprake, dat juncker Olrick offte sine erffgenamen sullen hebben van den van Holland, Zeeland ende Vriesland boven die vyffhundert Postulatusgulden, die hie daervan ontfangen hevet die summe van vyff ende twyntichhundert Postulatusgulden, dusent Postulatusgulden gerekent voer teynliundert, ende elck hundert vorder gerekent voer twe werff vyfftich der voerscr. gulden, die te betalen in onser stad Groningen in handen meyster Johans van Emden provest ende onsen kercheren tot onsen lieven Vrouwen nativitatis naestkomende, offte vierteyndage ten langesten onbegrepen te syn; des so sall die voerg. meyster Johan gemachtiget wesen van den voerscr. juncker Olricke behoerlike onthangende quitancien daervan te gheven van den voerscr. betaeldage den landen von Holland, Zeeland ende Vriesland by onsen woerden, formen ende ordinancien; ende weert sake, dat meyster Johan voerscr. hiir en bynnen afflyvich werde, so salt die ghene ontfangen, die juncker Olrick bynnen onser stad tot synre behoeff daerto ordinerende wertt; ghevende daervan behoerlike quitancien in behoerliker formen, als vorscr. is. Voer welk gelt voerscr. juncker Olrick voerg. voer em ende sine erffgenamen ende nakomelingen geholden sall wesen up die pene voerscr. die punten ende articulen die hiirnae bescreven staen onverbroken te holden ende te doen holden sunder alle argelist. Int eerste, dat hie in desser zoene ende vrede vervangen ende waren sall voer alle sine voerscr. landen, luuden ende ondersaten wo die genoempt sint, die hie na hevet ende hiir namaels verkrygen mach, ende voer die gene, die omme sinen willen doen ende laten willen, ende myt rechte sullen. Noch so sall hie vervangen unde waren voer Syben sinen neven ende voer Syrke ter Vredeborch ende oerer beyder erffgenamen ende nakomelingen, dat sie den van Holland, Zeeland ende Vriesland nicht beschedigen sullen noch doen beschedigen myt raede noch myt dade te water noch te lande in gheenre wyse. Ock so en sall juncker Olrick voerscr. ende sine erffgenamen nicht gehengen by oerer wytscapp ende todoen, dat yemant ock well sie syn offte waer die geseten sint, die sine ondersate nicht en sint, dat die den ingesetenen ende ondersaten van Holland, Zeeland ende Vriesland doer sine landen, stromen, havenen ende wateren, die hie nu hevet ende in tokomenden tiiden verkrygen mach ut, doer, noch in beschedigen sullen te water noch te lande in eniger wyse an lyve offte an guede. Desgelikes sall die hertoge ende here van Burgonien vervangen ende waren voer sine landen Holland, Zeeland ende Vriesland ende derselven landen, luuden ende ondersaten, wo die genoempt sint. Ock so en sall die here van Burgonien voerg. ende sine erffgenamen nicht gehengen by oerer wytscapp ende todoen, dat yemant ock well sie sint offte waer die geseten sint, die sine ondersaten nicht en sint, dat die de ingesetenen ende ondersaten juncker Olricks ende sinen landen doer sine landen Holland, Zeeland ende Vriesland voerscr. stromen, havenen ende wateren ut, doer, noch in beschedigen sullen te water noch te lande in eniger wyse an lyve offte an guede in allen formen ende manieren als vorscr. is. Ende weert sake, dat elck van den voerscr. parten offte oer ondersaten yet up den anderen te zeggen offte te clagen mochte hebben, dat sall elck an den anderen vervolgen myt rechte ter stede daer yd behoert, sonder dat desse onse zoene, vrede ende utsprake daer by yet gequetzet sall wesen. Myt dessen onsen zeggen ende utsprake sullen beyde parten ende dielen voerscr. in manieren voerscr. tot ewygen dagen versoent, vereniget ende mynliken tevreden wesen, onder malkanderen rustelyck ende vredelyck myt elck sinen ondersaten verkerende myt lyve, schepen ende myt guede up broke der penen voerscr. Desser breve sint drie all eens van woerde te woerden myt eenre hand ghescreven, daer elck partt voerscr. die ene aff hevet, ende wy den darden, omme ons in dessen mogen weten te richten. In kennenisse ende merrer vestenisse der waerheyt desser onser utsprake, so hebben wy onser stad zegell beneden an dessen zoenbreeff gehangen. Ende omme merrer zekerheyt wille desser zoene ende utsprake mede bezegelt myt des voerg. juncker Olricks zegell ende der voerg. landen Holland, Zeeland ende Vriesland zegell, dat sie van des voerg. herens van Burgonien wegen brukende sint, alze parte der vorscr. zaken die selve zegele hyran ghehangen. Ghegeven ende utgesproken up den hilligen Pinxter avent, dat namelyck is die vier ende twintichste dach in Meye, int jaer ons Heren dusent vierhundert viiff ende viifftich.

x

x

Fonds	Ostfriesisches Urkundenbuch, I
Fol.nr.	S. 600
Nr	687
Olim	Zwei Originale: Grosse Urkundensammlung Nr. 63 und im Reichsarchiv in Haag. Gedr. Brenneysen S. 78.
Jaar	1455
Datumcode	2405

x

x

x

Commentaar	Das städtische und herzogliche Siegel, letzteres mit Rücksiegel, stark beschädigt, das des Junker Ulrich dagegen, Schild mit Harpyie und Sporenrädern, Helm mit Lilie, und der Umschrift S. Ulrici capitalis in Norda et alias, gut erhalten.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 687