| Nummer:oub0678 | Datum:Emden, 2. Okt. 1454 | Overlevering:Editie | Vindplaats:Ostfriesisches Urkundenbuch, I, S. 593, nr. 678 |
Die Stadt Groningen und der Häuptling Sirk zur Friedeburg versöhnen sich nach langem, noch von den Zeiten Focko Ukena's herstammenden Streite, und versprechen den beiderseitigen Unterthanen und Kaufleuten freien Handel und Wandel.
In dem jaer unses Heren MoCCCCo veer unde viftich, des midwekens na sunte Michael dach, to Emeden in der broderen reventer, wart in vruntschope ghescheyden, torugge ghesat unde verliket alle unwille unde twidracht, de vor dessen breves datum was upghestan unde verresen tusschen den erbaren unde vorsichtighen mannen, dem rade unde stad Groningen myt eren undersaten up der enen, dem ersamen unde vromen manne Siricke, ter Vredeborch unde Ripesholte hovetlinge, unde sinen undersaten up der anderen syden, wo unde watvan de unwille off twidracht ock were ghekomen, et sy van selighen Focke Uken edder sinen kinderen off vrunden versproten, off welkerleye de schelinge hebbe ghewesen vor desser tyd und darvan is ghekomen, van welken beyde parten vorgheroert malkander vry, quyt, ledich unde loess schulden unde loveden myt handen unde munden, nimmer up malkander ansprake off claghe, wrake off vervolch meer te doen off to doende laten in ghoden truwen sunder arghelist, helperede unde nie vunde van dessen twidracht vorscreven. De beyde parten loveden desghelix als gheroert is malkanders undersaten unde koepluden vlytliken gherne to vordedingen, vlotten unde vorderen in oren ghebeden, wo, wo vaken, unde wanneer em des noet unde behoeff is vor alle de ghenne, de umme eren willen doen unde laten willen, unde von rechte scholen. Daer mede by an unde over weren de erwerdighen ersamen unde bescheden mans juncher Oelrick, to Awerke, Emeden, Berum etc. in Oestvresland hovetling, meyster Johan Vredewold, decretorum doctor, provest to Emeden unde korcheer to sunte Merten in Groningen, her Johan Munter, commenduer in Bursmonken, unde Wierd, to Oldersum unde Uphusen hovetling, unde andere veele erbare mans, Dat orkunde ihn Sirick ergenant mit mynen inghesegel; umme de menen vestenisse willen hebbe ick Sirick ghebeden den ersamen unde vromen man Eden Boinges, to Ghodense hovetling, desse vruntlike sone mede over my unde myne vrunde unde undersaten to beseghelen, welk ik Edo vorghescreven gherne hebbe ghedaen mit mynes seghels anhanginge.
