| Nummer:oub0665 | Datum:22. Sept. 1453 | Overlevering:Editie | Vindplaats:Ostfriesisches Urkundenbuch, I, S. 580, nr. 665 |
Der Häuptling Eggo zu Westerwolde überträgt dem Junker Ulrich seine sämmtlichen Ansprüche an Eigenthum und Gerechtsame, die ihm durch Erbrecht von seiner Grossmutter Fossa Kenesna her im Auricher- und Brokmerlande zustehen,
Wytlick unde kundich zii allen vromen luden, de dessen breff zeen, horen offte lesen, wo dat ick Eggo to Westerwolde hovetlincg myd vryen willen unde walberadene mode vrundliken updreghe unde overgeve vormyddelst macht dessen breves deme ersamen mynem leven neven juncheren Olrike, to Gretsyl, Norden, Aurike, Emden, Esenze, Berum etc., in Oestvreslande hovetlincg, unde synen erven alle herlicheit, erve unde rechticheit, dar ick van Fossa Keentsna, ridder Ocken broderdochter, myner oldemoder, wegene in Auriker- unde Brokmannelanden mochte up to sprekende hebben, unde hebbe dat deme vorben. mynen leven nevem unde synen erven updregen unde geven, so dat ick Eggo off nemend van myner wegene to ewigen tiiden up den erben. juncher Olrick off syne erven dar mer up klagen off spreken wille off schullen. Hiir anne unde over hebben ghewesen olde Imelo unde Wyard to Oldersum, den desse gave mede witlick ys, unde ick Eggo hebbe dessen tor kentnisse myn ingesegel witliken an dessen breff gehangen. Datum anno Domini MoCCCCoLIIIo, ame dage beati Mauricii.
