Verhandlung wegen des Eigenthumsrechtes am Langener Aussendeich, welches das Kloster Langen und die Bauern von Logum für sich beanspruchen, und Entscheidung des Streites nach dem Ausspruche Habbo's, des Vaters des Propstes zu Langen.
Wy Willem Brand amptman to Emeden, Otto van Duten, Schelteko Campen unde Albert Tydeken, borgermesters darsulves, bekennen unde betugen clarliken in der warheit vor allesweme in crafft desses breves, wo vor uns sint ghewesen Campo, hoeftling to Loghen, Hero Melifsna unde Omo darsulves, clagende van der ganssen bure weghen over den ersamen hern Ayto, provest to Langhen, dat he unde sine coventeslude em drunghen van ere uterdike, ligghende twisschen de olde Krighelwerff ofte Hlerlter uterdike wente to Langhener inloep, unde brukeden de mit unbeschede keghen der bure wille. Hiirto antworde desse sulve provest unde seghede: na den dat oer land leghe bynnen dykes neffen ore uterdike, so horden se ock den covente to mit rechte, want se hadden se rouweliken beseten unde mit vreden ghebruket langher wen hundert yaer beth to desser tiit sunder jenigherleye ansprake, unde wolden dat wal bewisen in der warheit mitten oldesten broders unde susters, der se in oren covente hadden. Do segheden Campo, Hero unde Omo vorscr. endrachtliken van der vorbenanten bure weghen, dat were nemende kundigher, dan Habbo, dessen vorbenanten provestes vader, wen desse uterdike van rechte horden, unde wilkorden upp em, wolde he dat van des coventes weghen allene tughen, se wolden des tovreden wesen, want se kenden em so erbar unde tuchwerdich, dat he dar nicht unrecht an segghen scholde. Dessen wilkoer namen se an to beiden tziiden, unde des provestes vader vorscr. scholde dit tuch doen to Langhen int closter, na den dat he was en olt kranck man unde kunde nicht wol bequemeliken to Emede komen, unde beide parte weren van uns begherende, dat wii de unse darmede wolden biisenden, de ende van desser sake mede antohorende. Do sanden wii dar Eggherk, des rades dener to Hamborch, de do tor tiit to Emeden was mit her Johan Gherwer, radman to Hamborch vorscr., unde desse sulve Eggherk nam mit sick vrome lude, de van unser weghen darmede bii scholden wesen upp dat dit recht vordert wurde na erer begheringe to beiden tziiden. Des quemen beide parte mit eren vrundes dar tor stede up den sulven dach, so em ghelecht wart, unde des provestes vader vorbenant stund dar jeghenwordich unde was overbodich to tugende na erer wilkor, unde seghede openbaer, dat van rechte anders nemende de vorg. uterdike tohorden dan den covente to Langhen. So was dar Otto van Duten, borgermester vorscr., de esschede Campo, Hero unde Omo vorbenant unde vormande se to dren tiiden, dat se van der bure wegen to Loghen den eed van Habben vorscr. scholden nemen na eres sulves wilkor. Do was dar nement van em allen, de dat recht untfanghen wolde, men se ghinghen van dar unde wurden eres rechtes neddervellich. Hiirmede sint se to enen ganssen ende gescheden, so dat desse vorbenante inwoners unde bure to Loghen offte ere kindere unde nakomelinge, boren unde ungheboren, dat covent to Langhen nicht meer scholen moyen ofte anspreken, noch moyen ofte anspreken laten mit gesteliken offte werlschen rechte in tokomen tiiden van desser sake wegen, sunder alle argelist, men se scholen em ere uterdike vorscr. mit vreden unde ghemake bruken laten bii ener pene van hundert Rinsche gulden deme amptmanne to Emeden to ghevende so vaken unde mannichwerve, dat se dit vorbreken unde nicht en holden. Des to tughe hebben hiir jeghenwordich mede bii an unde over ghewesen to Langhen int covent vor des provestes hus, dar desse sake is vorhandelt Otto van Duten, borgermester vorg., Eggherk des rades dener to Hamborch, Eppo Ewerksna, inwoner to Hlerlte unde anders vele guder lude. Des to merer tuchnisse unde groter witlicheit, so hebbe ick Willem Brand, amptman to Emeden vorscr., myn ingesegel, und wii vorbenante borgermesters darsulves unse stadingesegel witliken unde mit guden willen vor dessen breff gehangen. Screven na der bord Cristi unses Heren MoCCCCo unde vifftich yaer, des donnerdaghes vor unsser leven Vrouwen daghe assumpcionis.[*]
x
| Edities |
E. Friedländer, Ostfriesisches Urkundenbuch I (Emden 1878), nr. 629 |
