Schiedsspruch der Amtmänner zu Emden in einer Streitsache zwischen dem Häuptling Abeko Memmen zu Greetsiel und Folkard Popken zu Larrelt über Grundstücke im Hinter (?) Hammrich.

Wydick, kundich unde openbar sy alle den ghenne, de dessen breff seen off horen lesen, dat wy Johan Gherwer unde Albert Schreye amptmanne to Emeden bekennen unde betugen vor allesweme in desser scrifft, dat vor uns is ghewesen Abeko Memmen hoeftling, nu tor tyt wonafftich in der Gred, clagende over Folkard Popken to Hlerlt umme 6 grase landes, ghelegen in Klinter (!) hamrike[*] by konig Rebbeldes wech, [*] dar desse sulve Folkard to antworde, dit vorscr. erve hadde Hisko, wandages provest to Emeden, zelgher dechtnisse sinen vader ghegeven mitten diken. Des sint beede parte mit guden willen unde vorberaden mode endrachtliken by uns ghebleven, unde wy hebben dessen. vorb. Abeken in vruntschappe toghevunden 3 grase landes mitten diken, de anderen grase schal Folkard vorscr. beholden unde bruken to sinen willen: so dat desse ergenante Abeko heft em vorlaten alle ansprake van desses erves wegen, so dat he efte nemend van sinen vrunden darumme clagen edder spreken scholen in tokomen tyden, unde hyrmede sint se to enen ganssen ende ghescheden. Des to tughe hebben hiir mede bii an unde over gewesen de erwerdige mester Johan Vredewolt, provest unde kerckhere to Emeden, Hayko to Hinte, Erd[*] van Thornum unde Bene in der Gred, landrichters in Emsingherlande, Enno to Osterhusen unde anders vele guder lude. In orkunde der warheit so hebbe ick Johan Gherwer vorg. myn inghesegel van unser beide wegen vorb. witliken unde mit guden willen to dessen breve hangen laten. Gescreven na der bord Cristi M^oCCCC^oXLVIII yar, des mydweken na sunte Elysabeth.

x

x

Fonds	Ostfriesisches Urkundenbuch, I
Fol.nr.	S. 529
Nr	605
Olim	Abschrift im Farrago dipl. Ostfris., I. Nr. 1 'ex orig. Loppersumano'.
Jaar	1448
Datumcode	EpElisab

x

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 605