Die Rathssendeboten von Bremen und Hamburg schliessen Frieden zwischen den Häuptlingen Ulrich von Norden usw., Edo Boings zu Dykhausen, Sirk zur Friedeburg einerseits, und Tanno Duren zu Jever, dessen Bruder Sibet und Lubbe Onken zu Knyphausen andrerseits, namentlich über, die Sibetsburg, Schortens, Sengwarden und Inhausen.

Int jar unsses Heren M^oCCCC^oXLVIII, des donredages vor Viti, hebben vorramet de ersamen her Johan Vrese, her Hermen Gropelingk, her Hinrik Kluk, [*] her Johan Gherwer unde her Willem Brant, radessendeboden der stede Bremen unde Hamborch, ene vruntlike sone twischen Olrike to Norden, Brokmerlande, Esensen, Aureke unde Lenghen etc., Eden Boynghes to Diikhusen unde Sirke[*] tor Vredenborch uppe ene, Tanne Duren to Jevere, Sibet dessulven Tannen broder unde Lubben Onneken to Kripensen hovetlinghen uppe andere siiden, in desser nabescr. wise. Int erste scholen Olrik, Tanne, Sibet unde Lubbe vorben. alle erer schelinghe, twidracht unde unwille twischen en wesende bliven bi den ersamen van Hamborch, na lude unde uthwisinghe erer breve, unde sik van en in rechte ofte in vruntschoppe nach erer beider wille laten vorscheiden unde tweileggen[*], unde de breve scholen an beiden siiden bi vuller macht bliven. Vortmer der schelinghe twischen Eden, Sirke, Tannen unde Lubbe wesende scholen se bi den ersamen van Bremen unde van Hamborch in rechte ofte in vrundschoppe nach erer beider wille bliven to vorschedende, unde heft jemant breve, tughe ofte wurde, de mach he bringen vor desse vorscr. richtere, de wii vormiddelst desseme recesse noch vort noch achter setten. Hiirup schal alle schade, rof, brant, vanghene, schattinghe, dingktal stan bette[*] to der rechtesschedinghe unde uthsprake der van Hamborch van der veide wegene twischen Olrike, Tannen, Sibet unde Lubben geresen, unde de vanghene van beiden siiden scholen dagh hebben uppe borghe, de de hebben konen; de de nicht hebben konen uppe ere lofte unde ede bette uppe dessulven rechtes uthsprake. Wes over geschen in van schaden in vorscr. wise van Eden, Sirke, Tannen unde Lubben schal stan bette to der rechtesschedinghe unde uthsprake der van Bremen unde van Hamborch, unde hiirup scholen ok de vanghene van beiden siiden dach hebben uppe borghe, de de hebben konen; de de nicht hebben konen uppe ere loffte unde ede bette uppe dessulven rechtes uthsprake der van Bremen unde von Hamborch; unde hiirup scholen Lubbe unde Tanne, Ede unde Sirk[*] ere hande van beiden siiden holden uthe deme verndel[*] bette uppe de tiit, dat des rechtes uthsprake gheschen in. Heft over we[*] van beiden parten erve unde gudere in deme verndel[*] belegen rostliken unde rouweliken ane twidracht beseten, de mach he bruken to sinen besten unde willen. Men de erve unde gudere van Sibetesborch scholen stan unde der[*] nemant van beiden parten bruken, unde de hure, broke, tinse[*] unde des dar in deme verndel vorvelt, schal stan in enes guden presteren[*] hant, de dat to guder hant des ghennen, deme dat mit rechte toghevunden wert schal[*] vorwaren, den de van Bremen unde van Hamborch dar to voghen, bette uppe des rechtes uthsprake; unde Schortensen[*] kerspel schal stan in guden punten, so dat duslanghe ghestan heft, unde nement van den vorscr. parten schal de mit ghewalt unde boven recht bette uppe de vorscr. tiid overvallen; unde de van Sevewerde, [*] de van eren guderen gedreven weren, scholen vredesam ere gudere besitten unde den vrunden de de doden vor de kerken darsulves to Sevewerden gheleden hebben, scholen se to landrechte van der wegene antworden unde en[*] rechtes vor den vorscr. schedesheren uppe desulven tiit plegen; ok scholen Tanne unde Lubbe loven vor Alleken unde ene so gut holden, dat he binnen achte wekene Hero Tantsen late uppe Inehusen, unde dat he dat so gut untfanghe, alse he dar in van ghegan unde alse he des in vortiiden heft ghebruket, unde Alleke schal dat sine, dat he darup ghebracht heft, binnen dessen achte wekenen vredesam afbringen; ok schal de vorben. Ike sinen antal dessulven huses vredesam besitten unde bruken de tiit sines levendes to sinen willen. Ok schal[*] nemant van dessen vorscr. parten jenighe kerken unde godeshuse to schaden unde vorvanghe jeghen den anderen besetten sunder jenigerleie arghelist, unde laten de van stunden an quit unde vrig de besettet sint; worde ok jenich twidracht mit slachte ofte jerghene mede twischen der vorscr. parte knechte ofte den husluden, dar schal desse sone nicht mede werden ghebroken, men dat schal men setten to lantrechte. Weret ok dat jemant van dessen vorscreven parten mit deme anderen to jenighen unwille in berbancken unde anderswor mit worden ofte werken, wodanne wys dat schen mochte, dat Got afkeren mote, dar schal desse vorscr. sone nicht mede ghebroken wesen, men allikewol bi vuller macht bliven; unde darumme schal en deme anderen vor den vorscr. schedesheren rechtes, plegen unde sik van en in landrechte laten vorscheden. Hiirup hebben ghegeven ene sone de erbaren her Dethart[*] Sleter, deken der hilligen kerken to Bremen, unde Johan Truper[*] van Tannen, Sibetes unde Lubben wegene, unde meister Johan Vredewolt, provest unde kerkhere to Emeden, unde Imelo Haringha[*] van Olrikes, Edens unde Sirkes unde alle der ghenne de van beiden vorscr. parte wegene to der veide sint ghekomen; unde des vorscr. rechtes uthsprake scholen de erben. heren van Hamborch van Olrikes, Tannens, Sibetes unde Lubbens, unde de heren van Bremen unde van Hamborch van Tannens, Lubbens, Edens unde Sirkes wegene uthspreken binnen enen jare; unde willen desse vorscr. schedesheren de tiit en half ofte hel jar lengher setten, dat schal stan bi erem willen unde willekore; unde weret dat jemant van dessen vorscr, parten desse sone inbreke, dat Got afkeren mote, den willen dessen[*] vorben. beide stede Bremen unde Hamborch mit hulpe des ghennen, deme inghebroken wert, overvallen unde den sturen, so dat dar en ander wol schal an dencken[*]. Alle desse vorscr. punte unde artikelle samptliken unde bisunderen hebbe wii Olrik, Ede, Sirk, Tanne, Sibet unde Lubbe vorben. ghevulbordet, belevet unde angenomen, unde loven de in guden truwen stede, vast, sunder jenigerleie arghelist unvorbroken to holdende; unde hiirup schal men maken breve mit unsser aller vorben. parten anhangheden ingesegelen: tho welken breve wy vorben. parte al umme willen unde scholen bidden de vorben. stede ere ingesegele twischen dit unde nu en sondaghe[*] neghestkomende vort over achte dagen, dat namptlik is de avent Johannis baptiste, mede to hanghende; unde des to merer witlicheit hebbe ik her Dethart vorben. van Tannen, Sibetes unde Lubbens wegene her Johan Vresens ingesegel upt spacium dessen breves, des ik nu tor tiid hiirto bin brukende[*] umme ghebrek des mynes, unde ik Olrik vorben. vor mi, Eden unde Sinken myn secret dergheliken upt spacium desses breves heten drucken.

x

x

Fonds	Ostfriesisches Urkundenbuch, I
Fol.nr.	S. 518
Nr	593
Olim	Orig. im Archive zu Bremen. wegen der Anmerkungen vgl. die folgende Urkunde, Anm. 1.
Jaar	1448
Datumcode	JaViti

x

x

Commentaar	Die beiden Siegel sind mangelhaft erhalten.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 593