| Nummer:oub0576 | Datum:26. Juli 1446 | Overlevering:Editie | Vindplaats:Ostfriesisches Urkundenbuch, I, S. 504, nr. 576 |
In einem Streite über Erbgüter zwischen Tyark Bruxtem und Mauritz Kankena zu Dornum legt Häuptling Ulrich zu Norden usw. dem Letzteren den Beweis auf.
Ick Olrick tho Norden, Broeckmerlande, Emeden, Ezensen, Aurike und Lengen etc. hovetling, bekenne und betuge apenbare in dissen jegenwordigen breve vor alsweme, wo dat vor my sint gewesen de ersame mannen Tyerk Bruxtem, van Hisen siner eelyken hussvrouwen wegen, klagende uppe Mauricius Knacken tho Dornum wonafftich, umme erve und gudere, de desulve Tyerk sede Hizen siner eelyken husvrouwen vorb. thogevallen und angesturven, vormiddelst dode Folkelt Eensna eres vaders seliger dechtnisse. Darup antworde de vorbenante Mauricius und sede, dat he mit deme vorb. Folkelde sine gude fruntschup unde vaste sone hadde gemaket, und hadden under malckanderen men leve und fruntschup tho doende, dat he woll bewisen wolde mit dren guden presteren, also bi namen heer Olrike tho Nesse, heer Isebrande tho Norden und heer Umptit tho Lere, kerckheren, de dar an und aver schulden wesen hebben tho Dornum, du se de fruntschup und sone thosamende makeden. Also schedede ick de mit rechte desse vorgescr. bede parten na rade myner frunden in dusser nabeschreven wise, so dat Mauricius vorbenomet schulde des negesten sendes na sunte Michaelisdage na dato deses breves negestkamende bringen de voerbenoemede presters tho Berum voer den praveste tho Bremen und dar scholden[*] de prestere seggen und tugen vor deme sulven praveste, alse sick mit recht dat borede, dat de vorb. Folkelt de fruntlycke sone mit vrygen willen und unbedwungen mit Mauricio vorb. were angegaen, und wo und in wat wise und mate de fruntschup thogegaen were, und offt ock dat erve und guderen, dar desulve Tyerck is up klagende, in dersulven were genomet und uthgespraken. Hyr an und aver hebben gewesen de ehrwerdige heer Johan Vredewolt provest und kerckhere tho Emeden, heer Johan Pren medekerckheer tho Norden, heer Ommo vicarius tho Ezenzen, Onno Alderinga und Onno Ernsna und andere gude lude genoch. In orkunde der warheit, so hebbe ick Olrick vorb. myn ingesegel mit willen und wetenschope beneden tho desen breve laten hangen. Gegeven na Christi geboerte anno MoCCCCoXLVIo, des dingsdages na sunte Jacobi dage des hilligen apostells.
