| Nummer:oub0570 | Datum:Jennelt, 5. Nov. 1445 | Overlevering:Editie | Vindplaats:Ostfriesisches Urkundenbuch, I, S. 500, nr. 570 |
Die Häuptlinge von Eilsum und Westerhusen bekunden die durch Lutet Manninga bewirkte Beilegung des Streites zwischen dem Vogt Aitet und Sibrant Hayens zu Pewsum.
Wy Sybrant tho Edelsum und Wyloff Ewes zone van Westerhusen hofftlinghe entkennen und betugen to rechter warheyt in und myd dessen opene breve vor allen erbaren hofftlinghen und heren und vor allesweme, wo wy sint gewesen an, over und yegenwordich tho Geenlede binnen mitt andere velen erbaren warafftighen mannen, dat de erbare unse bezunderlinge vrundt und hofftling Lutedt Manninga tho Bergen in Norderlande und Geenlede vorbenoompt mit den zinen bysitteren ende mederadtgeveren na enen guden landtrechte utrichtede und endelick scheydede all[*] de twidracht und schelinge tuschen Aytedt voghet, Tethen zynes wives moder van der enen zydt myt eren vrunden, und Sybrandt Hayens und zyne vrunden van der anderen zydt zamentlich to Pewesum wonachtich in dessen mate: Als dat Sybrant Hayens myt twen warachtigen tugen scholde bewysen und tughen myt rechten reden, dat he dat zakereplike gudt, dar de schelinge vorbenomet van was, unvormynnert und nicht bekrencket, als em dat anghekomen was van Etten, Mammen Hybekens huysfrouwen, van dessulven Mammens zalicher dechtenissen gudes weghen dersulven Tethen vorbenoemt in teghenwordicheyt veler gude lude hefft gheantwordet und overgelevert. Welcke tugenisse, recht, eede und warheyt de benoemde Sybrandt vor em und de zyne vul und all tho rechter tydt und stede in unser yegenwordicheyt wetende und zeende als Sybrandt und Wyloves hofftlingen vorbenoemt und Ebben Nytterdes, Waleken Ockens und ander veler guder manne to Pewesum wonafftich und sunderlings van uns vorbenoemt togeropenen vicarii to Uttum heren Elardus hefft wal gheleverd und vullenbracht als vorbenoemt is, van welcken vorbenoemt und al des dar an ghehoren[*] mach myt rechte wy Sybrant hofftling to Edelsum und her Eltedt myt unses sulves ingesegelen und Wyloff vorbenoemt myt Ewes mynes vaders ingesegele omme gebrecke nu ter tyt mynes sulves ingesegels der warheyt als voerbenoemt bestarcken und vullenteen myt den vorb. ingesegelen apenbar gehangen an spacium desses breves. Ghegeven in den yare als men schreff na der bord Christi Jesu unses Heren, des neghesten vrydages vor sunte Lenerdes[*] daghe des hilgen biscoppes und martiris, dusent veerhundert und vive und veertich.
