| Nummer:oub0566 | Datum:Deventer 1444 | Overlevering:Editie | Vindplaats:Ostfriesisches Urkundenbuch, I, S. 496, nr. 566 |
Klagepunkte des ebenfalls vertriebenen Tiart (von Dokkum) gegen die Hamburger.
Leven erweerdigen heren, dit iss de clage de Tiaert unse sendebade clagede tho Deventer vor de gemene hensestede over de van Hamborch, dat de raet van Deventer van one nicht liden en wulde, dat he unse clage vullenbringen muchte aver de van Hamborch und ore medehulpers, want alle ore brieve de se uthschriven, wat se des doen dat doen se van der gemeene hensestede wegen, wente wy leten uns dat erbeden tho rechte vor juwen eergenoempten raedt und vor de gemene hensestede, offte dar jenichman weer, de uns muchte beschuldigen offte unse olders, dat wy jenigen koepman van dussen vorgeschreven hensesteden beschediget hadden tho water offte tho lande, dar wulden wy vorantworden mit live und mit guide tho eren und tho rechte want uns darenbaven groten hoemoet unde gewalt gescheen iss und uns noch alle dage geschutt und se Imelen unsen neven van synen slaete deefflicher wise baven recht, brieve und vorworde nha Hamborch vorvoert hebben, und dar beneven hebben se uns unde unsen frunden unse borge und sloete nedergewurpen unde nement uns noich alle daege unse rente und guider, baven contracten, vorworden und bezegelde brieven und hebben unse frunde gedoedet, eendeels gehangen unde up reder gesettet und vordrencket und hebben mit uns gehandelt, als men mit gene karstenluiden handelen schulde baven recht und reden, dar se velicheit soechten, van de sacramentshuise genamen, dat wy woill bewisen koenen; dussen vorscr. hoemoet doen se uns und unsen frunden, unde se hebben den koepman ihn unsen schyn mannichwerve beschediget, dat wy mit ore egene koepluide, borgers und inwoners der gemeenen hensesteden woill bewisen koenen. Lieven erweerdigen heren, raedt mynes gnedigen heren van Burgundien und reden der erbaren steden van Hollandt, want wy hir by ju gekamen sint, begeren van ju hoichwisheiten, dat gi uns hirinne willen raden, dat wy juwe viande und de unse muchten krencken und schedelich wesen so veer se uns tho genen rechten willen staeden und uns by unse arve und guider kamen laten, stellen uns dannoch tho rechte und juwer erkentenisse.
