Rederd Beninga schwört dem Häuptling Ulrich von Norden usw. und der Stadt Hamburg bei Vermeidung des Verlustes aller seiner Güter treu und hold zu sein.

Wytlick, kundich unde openbar sy allen erbaren vromen luden geestelick unde werlisch, Vresen unde Duetschen, de dussen breff seen of horen lesen, wo ick Redert Beninga bekenne unde betuge clarliken in der warheit, dat ik hebbe lovet unde gesworen, love unde swere jegenwordich in craft dusses breves deme ersamen vorsichtigen Juncker Ulrike to Norden, Brokmerlande, Esense, Emeden, Awerke unde Lengen etc. hoeftling, dat ick nummermeer na dessen tiiden wil doen keghen em oft den zinen, noch keghen den raed van Hamborg unde alle den ghenne, de id mid em beiden holden, den ze vorbidden unde vordegedingen willen. Vorder so bekenne ick, dat ick deme vorben. Ulrike unde sinen vrunden boren unde ungeboren wil unde schal truwe unde hold wesen so lange als ick leve, em unde den sinen bistendich unde behulplick wesen mid live unde mid guede, oer beste to weten, oer argeste helpen to keren na all myner macht. Ock weer sake, dat ick hiir breclick ofte neddervellich in wurde, unde men mochte my dat over bewisen, dat ik nicht en hilde alse vorscreven is, der God vorbede, so wyl ick vorbord unde vorbroken hebben sunder weddersprake keghen dessen ergenampden Ulrike unde sinen rechten erven al myn gued unde erve, wes ick hebbe offte wat my in tokomen tiiden angheervet mochte werden, id se ghast, mersch edder moer, waer dat ghelegen is. Alle desse vorscr. articule hebbe ick Redert in guden truwen lovet unde ghesworen mit upgerichte liifflike vingheren stavedes edes to den hilgen deme vorben. Ulrike unde sinen vrunden stede vast unde unvorbroken alse en gued kerstenmynsche to ewigen tiiden truweliken to holdene sunder alle argelist. In orkunde der warheit so hebbe ick Redert vorscr. myn ingesegel hangen heten an dessen breff unde hebbe vorder umme merer bekanntnisse der warheit vruntliken gebeden den erbaren vromen luden borgermesteren unde rad to Emeden um erer stad ingesegel, dat se umme myner bede wille mede hebben hangen laten an dessen breff. Na der bord Christi M^oCCCC^o, darna an deme twe unde veertigesten jare, des mydweken vor sunte Bartolomeus.

x

x

Fonds	Ostfriesisches Urkundenbuch, I
Fol.nr.	S. 482
Nr	546
Olim	Orig.: Grosse Urkundensammlung Nr. 49.
Jaar	1442
Datumcode	EpBartho

x

x

x

Commentaar	Siegel: 1. Zerbrochen, in der linken oberen Ecke eine Rose. Als Helmschmuck eine Rose. Umschrift: s. Redardi hovetl........ 2. Das Stadtsiegel zerbrochen.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 546