| Nummer:oub0539 | Datum:10. Mai 1442 | Overlevering:Editie | Vindplaats:Ostfriesisches Urkundenbuch, I, S. 474, nr. 539 |
Frau Adda Itzinga überträgt an Friedrich zu Larrelt ihren Antheil an der Burg und Herrlichkeit Hinte.
Witlick, kundich unde apenbaer sy allen gueden luden, de dessen breeff seen ofte horen lesen, dat ick Adda Itzinga enkenne ende betughe apenbaer in dessen breve, dat ick hebbe gegeven, jegenwoerdygen updrage ende toscelde, Frederiek to Lherlte, zaligen Haren soen, mynen besundergen leven oem ende vrundt, ervegoeder, heerlickheit, de ick hebbe to Hynthe, unde my myt rechte boeren mach; sunderlynge myne antale der hofstede van Hynther borch, dat he dat mach besitten ende bruken, erven sende vorkopen na synen willen nu unde to ewygen tyden voer hem unde synen erven oft anerven, unde ick Adda vorscreven do tuchnisse jegenwordich myt craft desses breves, of in voertiden gegeven, gescreven, ofte gemaket sint jenige breve, de inholden, roren, ofte bewys doen van heerlickheit, guedere, erve of der borchstede te Hynte, dat my dat unwitlick is, vornichte ende dale legge alle bewys, dat van mynen wegen is ghescheen of scheen mochte in tokomen tyden, ende make Frederike vorscreven, synen rechten erven of anerven to rechte erfnamen nu unde to ewygen tyden sunder alle ansprake, nyevunde of nye intoge. Hyr hebben an ende aver gewesen heer Poppe abbet to den olden cloester to Norden, heer Dirck, heer Sybaldt, heer Wilhelm, ende heer Isbrandt karckheren to Norden, Halle Haerlsen unde Nonne Ruther, inwoners darsulves, ende ander vele guder luden. In tuchnisse unde oerkunde der waerheyt hebbe ick Adde vorscreven myns saligen vaders segel witlyken hangen heten ant spacium dusses breves unde hebbe umme merer bewysynge der waerheit gebeden den ersamen heren Poppen abbet to Norden, ende samptliken de karckheren to Norden, dat se oeck eer zegele hebben angehangen ant spacium dusses breves. Gegeven unde ghescreven in den jaer MoCCCCo ende XLIIo, up Gades hemmelvardts dach.
