Die Stadt Bremen verspricht für den Fall, dass der eben geschlossene Friedensvertrag von Hayo Harldes, Lubbo Onken und den Gebrüdern Kankena nicht beachtet würde, auf Seiten Edzards und Ulrichs stehen zu wollen.
Wy borgermestere unde radmanne der stad Bremen, radgeven unde gantze lant to Butenjade bekennen unde betugen openbare in dessem breve vor alsweme, so alz twusschen dem slote unde dem clostere Ezense fruntlike degedinge, utsprake unde en sone twusschen den vromen mannen Edserde unde Olrike to Emeden und Awerkelanden hovetlinge unde eren vrunden upp ene, Hayen Harldes to Jevere, Lubbe Onneke to Kripense, brodere den Kancken to Dornem hovetlinge, unde eren vrunden up andere syde sint vorhandelt unde gedegedinget, welke fruntlike schedinge unde sone se an beydentsiden alle gelovet unde gesworen hebben to holdene unde sodanne degedinge, schedinge unde sone se an beydentziden alle vorbenant, vort by achte erer vrunde unde by enen overman, offte des behoff is, gesat hebben in vruntscuppen offte in rechte se to vorscheden, unde wo unde in wat mate, dat desse vorbenante beide parte mit eren vrunden van dessen vorgenanten achte schedesluden mit dem overmanne, offte des to donde is, gescheden werden, dat scholen unde willen en jewelk pars mit sinen vrunden jo holden unde deme so vuldon. Were aver dat Haye, Lubbe unde brodere de Kancken hovetlinge vorbenant unde ere vrunde utsprake der schedinge, degedinge unde sone, so alz se de belovet unde besworen hebben, nicht en helden unde utginghen und jegen de genante Etserde unde Olrike vorbenant unde eren vrunden jergen ane brochafftich worden, des Got nicht en wille, so scholen wy borgermestere unde radmanne to Bremen unde wy radgeven unde gantze land to Butenjade des by den genanten Edserde, Olrike unde eren vrunden truweliken blyven myt gantzer macht unde des jegen Hayen, Lubben, de Kancken unde ere vrunde hebben unde dar en jegen don so lange, dat se alle degedinge, utsprake der schedinge unde sone holden, vuldon unde alle gebrek darane vorvullen; dat loven wy borgermestere unde radmanne to Bremen, radgeven unde gantze lant to Butenjade den genanten Edserde unde Olrike broderen vorscr. unde eren vrunden in guden truwen stede, vast unde unvorbroken to holdene sunder argelist. Des to tuge so hebben wy borgermestere unde radmanne vorbenant unser stad, unde wy radgeven unde gantze lant to Budenjade unses landes ingesegele gehangen to dessen breve. Geven na Godes bort verteynhundert jar, darna in dem en unde vertigesten jare, des sondages na des hilgen lychams dage.
x
| Edities |
E. Friedländer, Ostfriesisches Urkundenbuch I (Emden 1878), nr. 526 |
