| Nummer:oub0516 | Datum:24. Juni 1440 | Overlevering:Editie | Vindplaats:Ostfriesisches Urkundenbuch, I, S. 459, nr. 516 |
Der Häuptling Friedrich von Larrelt und Uphusen verkauft dem Kloster Palmar 15 Grase Landes bei dem Vorwerk Bohnenburg, und behält sich binnen drei Jahren das Wiederkaufsrecht vor.
Ic Frederick tho Hlerlt hoveling nu der tyt to Uphusen, bekenne unde betughe in dessen openen breve voer alle de ghenen, de ne (!) sien ofte hoeren leesen, dat ic mit consent Ettes myner huysvrouwen hebbe vercoft ende yeghewoerdich vercoepe her Folkerd, provest to Palmaer, [*] 15 grase landes, de ghelegen syn tussen dat voerwerck totter Bonenborch[*] in Emisgerlant ende gheheyten in den quaten dyc um enen summe geldes, als acht stighe Arensgulden, welker summe gheldes my de provest voerscr. vol ende al heeft betaelt na mynen willen. Hierom so drage ic over voer my ende myn eerfgenamen dat voerscr. lant den provest voergenant ende syn convent vry to bruken na horen wille, unde dit voerscr. lant mach Frederick voerscr. weder loesen mitten voerscr. summe geldes binnen drien jaren na datum dessen brieves; ende weer dat zake, dat Frederick of syn eerfgenamen dat voerscr. lant niet en loesden, so sal dat convent voerscr. dat lant beholden tot ewighen tyden sonder al arghelist. In orkonde der waerheit, so heb ic mynen zegel drucken laten up dat spacium desses breves. Ende om een meerre vestenisse ende bewisinghe so heb ic ghebeden heren Reyner totter groter Munte[*] ende heeren Memmen totter luttiker Munte kerckheren dessen brief mit my to bezegelen, unde wy Reynerus ende Membodus voerg. om beden willen Frederics voerscr. (hebben)4) dessen brief mede bezegelt. Int jaer ons Heren MoCCCCo unde XLo, up sunte Johannes dach tot midsomer.
