| Nummer:oub0507 | Datum:Den Haag, 1. März 1439 | Overlevering:Editie | Vindplaats:Ostfriesisches Urkundenbuch, I, S. 450, nr. 507 |
Die Holländer fordern (den Magistrat zu Hamburg) auf, die gefangenen und vertriebenen Ostfriesischen Häuptlinge als Unterthanen ihres Herzogs frei zu geben und zu restituiren.
Erbare, lieve und guide frunden; also als idt nhu thor tidt geboert, Imelen van Hinte und van Grimersum, de een undersaete iss van unsen gnedigen heren van Burgondien und Brabant etc., und de nhu waenachtich iss hir ihn des Greven Hagen, hefft uns clegelich tho erkennen gegeven, wo dat em syne guider vorentholden werden, und dat mer iss Imelen van Hinte hoevetlinck tho Oisterhuisen, Ailt provest van Hinte, Frederick hoevetlinck tho Larrelt und Redert tho Grotehuisen hebben gefangen baven und seer der tidt, dat se und elck van one ihn unses vorscr. gnedigen heren bescharmenisse unde protection synnen gewest. Und ock baven sulche sone und vordrach, als umlanges gemaket iss gewest tusschen den ses Wendischen stede und undersaeten, dusse unses gnedigen heren lande und undersaeten, ihn welcher son als wy voirstaen hebben, se gement hadden befredet tho wesen, angesehen dat de von Hamborch und de ore darmede ihn besoent sinnen, und also by dat ore darumme tho kamen vormeenden, dar baven se sinnen gevangen wurden und gesatt, dat uns frombde doit. Nichtomyn um alles besten willen und up dat sick unse gnedige heer nicht vortorne, dat gi mit syne undersaeten also ummeghaen als vorgeschreven iss, so vorsoeken und begeren wy van ju, van wegen unses vorgeschreven heren, dat gi den vorbenompten heren Imell van Hinte und van Grimersum syne guideren und renten laten volgen, und ock dat gi Imell van Hinte und Oisterhuisen, Ailt provest tho Hinte, Frerick van Larrelte und Redert van Grotehuisen ju frye der will untslaen und uth der gevenckenisse latene rustelich und fredelich ore guider laten gebruiken, als se ihn vortyden gedaen hebben, und nhu moegelick gi schuldich sint tho doen, up dat uns van wegen unses vorscr. genedigen herzu, vorder geen behoeff en sy, one und enen ideren besunder, vorder jenige vorseennicheit (darup oren schaden tho vorhalen) tho geven, als billich behoeren schulde, dat wy jummer nicht gerne en deden, also veer als idt mit jenige reden gescheen muchte, wy gerne darvan untslagen tho wesen, als vorgescreven steit. Und offte gi offte jemant anders up de sulvigen je tho seggen offte tho vorvolgen hebben, mit lantrechte willen doen, des willen se ock gerne geneten und tho lantrechte staen, ihndeme dat men one desgelikes wederumme doen will, erbaren leven guiden frunden, also als dat sick geboert; hiraff begeren wy ju beschreven antwordt, dar wy uns nha richten moegen. Godt sy mit ju. Geschreven ihn den Hagen, anno 39, den ersten Martii.
