| Nummer:oub0498 | Datum:16. Aug. 1438 | Overlevering:Editie | Vindplaats:Ostfriesisches Urkundenbuch, I, S. 443, nr. 498 |
Lübeck und Hamburg bevollmächtigen den Bürgermeister von Danzig, den Bischof von Münster zu einer Tagfahrt in Wildeshausen zu bewegen, um über die Misshelligkeiten wegen Emdens und des Propstes Imelo zu berathen.
Wytlik sy, dat umme twydracht unde unwillen, de gewesen hefft unde noch is twischen dem erwerdigen heren hern Hinrike bysschoppe to Munstere up ene, unde den ersamen heren borgermeistern unde ratmannen der stede Lubeke unde Hamborch up de andern syden, alse umme dat slot Emeden unde Ymelen proveste etc., dar doch vele arbeides vormiddelst bodeschoppen unde scrifften twisschen beyden delen umme syn bescheen, umme dat se mit deme heren bisschoppe to Munstere sulven uppe legeliken steden unde veligen daghen tosamende mochten hebben komen, des doch bette herto noch ny bescheen en konde, unde umme dat men erkennen moghe, dat des an uns erberen van Lubeke unde van Hamborch nyn gebreck en hefft gewesen unde noch nicht en is, so hebbe wy erberen von Lubeke unde van Hamborch dem ersamen her Hinrike Vorrade, borgermeistere to Dantzike, macht gegeven to wervende an den erberen heren bisschoppe, sin cappittel unde an den rad der stad Munstere, dat de erberen van Lubeke unde Hamborch gherne uppe legelike velige daghe unde stede komen willen, alse bynnen Bremen, unde dat de here bisschop to Munstere syk wille neghen unde dar ingheven to Wildeshusen to komende, dar des heren ertzebisschoppes to Bremen, des heren bisschopes to Munstere unde der genanten stede Lubecke unde Hamborch rede unde sendeboden twisschen mochten ryden, claghe unde antworde to horende, unde de zake to verhandelende efft men se to gutlikeme ende bringhen mochte, wente de genanten stede syk verbeden recht to donde unde to nemende, wes dar in dem rechten vorghan schole dar dat voregha, darto schole de erwerdighe here here ertzebisschop to Bremen erer to rechte unde to aller redelicheit mechtich wesen. Des to merer witlicheit sint desser scriffte twey gemaket, de ene ute der andern gesneden. Na der bord Cristi verteinhundert jar, darna in deme achte unde druttigesten jare, des sonnavendes na unser leven Vrowen daghe assumpcionis.
