Edzard von Greetsiel nimmt unter Berufung auf den Marienhaver Vertrag die Nordes alten Lande in seinen Schutz.
In nomine Domini. Amen. Witlick, kundich unde openbar ze id all den ghenne, der dessen breff zeen off horen lesen, dat ick Edzerd, in der Gred unde in Norder nye lande hovetling, bekenne unde betuge clarliken in der warheit vor allesweme myt crafft dessen breves, dat ick myt guden wyllen, vorberaden modes, vulbord unde consent myner vrunde umme orbar, salicheit unde vredes weghen hebbe untfanghen unde anghenomen, untfa unde anneme yeghenwordich Norder olde land under myne beschermynghe so lange als ick leve, dat to schippen unde to regerende gelich de hovetlinge hebben gedaen in vortyden, unde ick zal myt em wonen in den olde lande off anders, war my dat alder bequemest ys na myner begheringe. Ock zal ick mechtich wesen up to boren unde to nemen alle vuntgud unde broke, de my myt rechte boren mach, als dat eer desser tiit gewesen hefft sunder eghendom, unde ick zal nemende van der menheit myt ghewelde overvallen boven ziin vordeenst. Item so zal alle schelinge, unwylle unde twidracht, hat unde nyt, de van der partye weghen tusschen der meenheit ryck unde aerm unde ere knechte in Norder olde lande ghewesen hefft tusschen my unde myne vrundes in wat mate off maneer, dat yd to komen edder gescheen is, dat zal gansliken neddergelecht unde vorgheven wesen sunder alle argelist. Item wert sake, dat dar yemend were, der de gude mans unde menheit in Norder olde lande myt unrechte wolde overwallen, dat wyl ick Edzert vorser. helpen keren myt lyve unde myt gude na all myner macht; desgelike scholen se wedder doen by my unde myne vrundes. Item so zal de menheit in den olde lande er erve umbekummert van myner wegen vry unde velich myt ghemake bruken, dar se recht to hebben. Ock so will ick unde myn broder vullenkomeliken blyven by twe gude presters unde 4 layen, de uns in vruntschop scholen scheden van den theen unde waldes weghen; desgelike scholen so ock doen. Item wert sake, dat dar schade, twidracht of doetslach scheghe in Norder olde lande, der God vorbede, dar ick nicht yegenwordich were unde mochte bynnen 8 dage off 10 myn edder meer sulven nicht to Norden komen, so zal ick de sake bevelen 6 off 8 gude mans to schedende edder den dach to holden up myne tokumpst, unde bynnen der tiit zal dar vorder neen schade scheen. Ock so zal ick nene breve scriven laten under des landes ingesegel sunder oeren weten, unde de gude mans van der menheit scholen my mede ghunnen enen slotel to den bloke, dar dat ingesegel unde secret ynne ligghen. Alle desse vorscr. articlen unde en giislick besundergen, so dar to sunte Marienhove vorramet unde gededinget is, love ick Edzerd vorscr. stede, vast unde unvorbrekliick to holden sunder alle argelist. In orkunde der warheit so hebbe ick ghebeden den ersamen her Poppen, abbet to den olde closter, den kerkheren to Norden, Ulrick mynen broder unde Lutet Mannyngha myn swagher, de er ingesegel by dat myne mede hangen hebben to dessen breff. Screven na der borth Christi MoCCCCoXXXVIo, des sondages na unses leven Heren hemmelvard.
x
| Edities |
E. Friedländer, Ostfriesisches Urkundenbuch I (Emden 1878), nr. 456 |
