Desgleichen das Kirchspiel Horsten.

Wy Eylerd Here unde dat ganse kerspel to Horsten enkennet openbare in dessen breve vor allesweme, dat wy uns leffliken unde vruntliken hebben vordregen unde vorgan myd dem eddelen juncheren Diderike, greven to Oldenborch, unde synen erven in sulker wis so hiir nascreven steit: dat wy een willen unde scholen to ewigen tiden truwe unde holt wesen, dewile dat wy leven, unde nummermer ere argeste to donde ofte to wetende, noch dages eder nachtes hemeliken ofte openbar. Ok so wille wy unde scholet en yewelik in unseme kerspel wanaftich greve Diderike unde synen erven vorscreven des yars to allen sunte Vites dage geven achte Bremer grote to knechtgelde, unde we dar ene egene ploch heft, schal een to allen sunte Michaelis dage dar na geven ene tunnen roggen unde ene tunne haveren. Bouwet dar ok we myd ener halven ploch, de schal een geven ene halve tunnen roggen unde ene halve tunnen haveren, unde den wille wy unde scholet een yo lesten to dem Konenvorde. Overst wonede dar ok welk weduc, dc nicht en bouwede unde egene roeck hadde, de schal en geven ver Bremer grote to der vorscr. tiid, darvor, dat me see vordegedinget. Wer ok dat unser en ofte mer eder wy alle tiegen den greven ofte synen erven vorscreven eder eren amptluden besecht worden, eder oft unser een dem anderen wes to to seggende hadde, ofte tiegen em wes vorbreke, we darumme schuldiged were, de mach sick des entladen na Vreschen rechte oft he kan; kann he overst nicht, so schal he dat den greven ofte synen erven vorscr. beteren na gueden ofte na rechte; unde wo dar nyne schult an en heft, de en darf des nicht entgelden. Ok schuldiget unser en den anderen warumme dar broke an ys, dat wille wy unde scholet dat vorclagen unde vorvolgen vor den greven ofte synen erven eder eren amptluden vorscr., welk unser den wes heft vorbroken, den broke scholen se deger unde al upboren; unde en alle desse vorscreven stucke, articule unde wort unde der en yewelik bisunderen love wy Eylerd Here unde ganse karspel to Horsten vorbenant den eddelen greve Diderike unde synen erven vorscreven in guden truwen in dessen breve stede unde vast to holdene, unde hebbet dat na mit unsen upgerichteden liffliken vingeren stavedes edes to den hilgen gesworen sunder alle nygevunde, hulperede unde argelist utgesproken; unde hebbet des to tage wy ganse kerspel vorbenant mit guden willen unses kerspels ingesegel witliken gehenget laten to dessen breve. Na der bord Christi verteynhunderd yar, darna in deme sess unde dertigsten yare, des dinxstedages to Paschen.

x

x

Fonds	Ostfriesisches Urkundenbuch, I
Fol.nr.	S. 413
Nr	453
Olim	Orig. im Grossherzoglichen Archive zu Oldenburg. Gedr. Ehrentraut, Fries. Archiv I. S. 496.
Jaar	1436
Datumcode	MpPasche

x

x

Commentaar	Siegel: Ein Ritter zu Fusse, der in der R. ein grosses abwärts gekehrtes Sehwert, und in der L. ein Wappenschild, welches mit einem Kreuz belegt ist, trägt. S. des kerspels sege .. to Horsten.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 453