| Nummer:oub0451 | Datum:1. März 1436 | Overlevering:Editie | Vindplaats:Ostfriesisches Urkundenbuch, I, S. 411, nr. 451 |
Styld Goden schenkt den Häuptlingen Edzard von Greetsiel und Lutet Manninga zu Bergum 2 Diemath Landes in der Ostermarsch.
Wytlick, kundich unde openbar sy all den ghenne, dee dessen breff zeen off horen lesen, dat ick Styld Goden[*] bekenne und betuge clarliken in der warheyt vor allersweme mit krafft desses breves in yegenwordicheyt des ersamen her Poppen, abbet to olde cloester in Nordenlande des ordenn sunte Benedicti, her Reyner kerckher to Erle, [*] her Habbo kerchere tho Haga[*] und her Willem medekerckher to Norden, Hocko to Berum und Udo Alberdsna, dat ick mit vryen willen, sundes lyves, vorberaden modes, sunder alle wedersprake hebbe overgegeven und upgedragen deme eersamen Edzerde, in der Gred und in Norder nyelande hofftling, und Lutet Manninga synn swager, hofftling to Berghum, [*] negen und twintich demede landes ghelegen in de Ostermersch[*] in dat suden van Ebe Hunnen[*] werff, der Hilrick Ayken er desser tydt hefft to huyre gehat, und darto all dat erve, der Urchsmen und junge Wylle mit dessen vorschreven erve bekummert hebben, also dat Edzerd und Lutet hofftlynge vorben. scholen vollenkamelicken mechtich wesen dit vorschreven erve to bruken, to vorsetten, oren vrundes to ervende off to vorkopen lyck er eghen sunder all argelist, nyevunde und hulperede. In orkunde der warheyt so hebbe wy her Poppe abbet to den olde cloester, her Reyner kerckher to Erle, her Habbo kerckhere to Haga und her Willem medekerckher to Nordenn umb vruntliker bede wille des vorben. Stydelfs Godynghe unse ingesegelen witlicken hangen heten beneden to dessen breve. Scriptum na der borth Christi duysent veerhundert sess und dertich, des donredages in der vasten vor Reminiscere.
