| Nummer:oub0395 | Datum:6. Jan. 1431 | Overlevering:Editie | Vindplaats:Ostfriesisches Urkundenbuch, I, S. 365, nr. 395 |
Die Bauerschaft Campen erkennt Imelo von Osterhusen u. s. w. zu ihrem Häuptling an, verspricht eine Abgabe und gelobt Treue, wofür ihr von Imelo Schutz zugesichert wird.
Wi gemene meente des buirschupes tho Kompen[*] ihn den Ham[*] geseten bekennen und betuigen apenbaer vor allen ersamen guiden luiden, de dusse jegenwoerdige schrifft sehen oder hoeren lesen, und bewisen des mit dussen apenen bezegelden brieve, dat wy hebben Imelen hoevetlinck tho Oisterhuisen und Grimersum etc. synen kinderen, rechten arffgenamen und nhakomelingen, gebaren unde ungebaren, laven mit handen und upstaveden vingeren, gesekert und gesworen mit den munde ihn den hilligen ihn dussen jegenwoerdigen brieve vor uns alle samptlichen, vor unse kindere, arffgenamen und nhakamelingen, gebaren und ungebaren tho ewigen dagen ihn guiden vasten geloven und ihn waeren truwen, dat wy vorscr. und unse arffgenamen und nhakoemelingen, gebaren und ungebaren scholen und geerne willen Imelen vorscr., synen kinderen und rechten arffgenamen und nhakoemelingen gebaren und ungebaren bekennen, hebben und holden nhu und jummer tho ewigen daegen vor unsen oversten und unsen hoevetlingen und desgelikes wesen Imelen, syne kinderen, rechten arffgenamen und nhakoemelingen gebaren und ungebaren bystandich mit liff und guidt waer, wanneer, ihn welcker stunde wy vorscr. und unse kinderen, rechte arffgenarnen und nhakoemelinge, gebaren und ungebaren des van Imelen sine kinderen und rechte arffgenamen und nhakoemelingen begeert und geeschet werden tho synen besten und tho voerscr. Imelen kindern beste nha landtrechte, waer, wanneer und ihn welcke stunde Imelen vorscr, und synen kinderen des behoeff und noet doit; unde des geliken willen wy Imelen und syne vorscr. kinderen und rechten arffgenamen und nhakoemelingen, ore viande und wederpartie, und de em und den synen vorbenoempt willen offte beginnen tho beschedigen, ihn vordrucken, tho vorhoemodigen ahn synen live, guide unde heerlicheiden baven lantrecht, dewille wy helpen legen tho staen, tho krenckende und tho stuirende, also dat Imell vorscr. und sine kindere unvorhoemodet, unvordrucket und unvorunrechtet vor enen ideren moegen bliven. Item so wille wy und scholen Imelen und syne vorscr. kinderen und arffgenamen gebaren und ungebaren tho staen alle recht und heerlicheit, de ihn unse vorscr. Comper buiren gelegen sinnen tho ewigen dagen. Voert ahn so scholen und willen wy vorscr. und unse arffgenamen Imelen vorscr. und synen kinderen vorscr. elckes jaers geven tho ewigen daegen enen halven lichten gulden tho huire vor de warve, de Imelen offte de synen vakenbenoempt ihn unsen dorpe van rechte tho hoeren jegenwoerdich, offte vor de warve, de ohne offte synen kinderen in thokamenden tiden moegen weerden, se koepen de warve oder se weerden ohne gegeven offte upgedragen van guiden luiden. Des so luvet unss Imell vorscr. mit handen unde upstaveden vingeren, sekert und sweert mit den munde ihn den hilligen unde unse arffgenamen und naekoemelingen, gebaren unde ungebaren uns tho erkennen, hebben unde holden vor syne undersaeten und unss vorscr. unde de unse stedes wyll wesen bystendich mit live und mit guide waer, wanner, und in welcker stunde wy vorscr. Comper bueren und unse vorscr, kinderen des van Imelen vorscr. und syne kinderen und nakomelingen, gebaren und ungebaren begeren sint nha lantrechte tho beschermen war he kan unde mach. Dusse vorscr. articulen lave ick Imell und myne kinder stede, vast und sunder argelist tho holden, desgeliken ock wy gemene buiren unse kinder und nhakomelinge tho ewigen dage, gebaren und ungebaren, de loeffte, eede und vorsekerunge und unthetinge alle vorgeschreven, willen wy Imelen vorscr. synen kinderen, arffgenarnen und nhakoemelinge, gebaren und ungebaren holden nhu und jummer tho ewigen dagen ihn guiden truwen, stede, vast und unvorbraken vor uns, unse kindern und arffgenamen, dit alle vorscr. mit live und guidt getruwelich nhakomen, sunder alle argelist, hulperede, niefunde darvan uthbescheden, de dussen jegenwordigen bezegelden brieff jergent mede hinderen offte straffen moegen, und dusse vorgeschreven articulen tegengaen. Ihn orkunde dusser waerheit und merer kentenisse, hebben wy gemeene meente des buirschuppes tho Compen samptlichen mit den anderen mit frien willen, unbedwungen, mit guiden beraden moede, gebeden unsen karckheren, den eerlichen guiden priester, heren Claus karckheer tho Compen, dussen brieff vor uns tho bezegelende, des syne ingezegell jegenwordich apenbaer van em iss doen hangen ahnt spatium dusses brieves, unde umme merer bevestenisse dusser vorscr. puncten unde articulen tho holden, so hebbe ick heer Poppe vicedekanus tho Grotehuisen mine zegell ock mede ahn dussen brieff gehangen um fruntlicher bede willen dusser vorscr. guiden luiden. Int jaer unses Heren dusent veerhundert een und deertich, up der hilligen dre kuninge dach.
