| Nummer:oub0389 | Datum:3. Nov. 1430 | Overlevering:Editie | Vindplaats:Ostfriesisches Urkundenbuch, I, S. 360, nr. 389 |
Edzard von Greetsiel nebst einigen anderen Häuptlingen vermittelt eine Sühne zwischen den Seinigen und Uko Fockena zu Oldersum wegen des Schicksals der Burg Oldersum, ihrer eventuellen Schleifung und wegen des Vermögens und künftigen Aufenthalts von Uko’s Gemahlin und Schwägerin.
Wi Edzardt Ennen soen, Eppe Gowkingha und Haie Ripperda, Ailko und Ippo Walsena, hoevetlingen tho Greetzyll, Westerbroeck, Farmsum, [*] tho der Munte und tho Amdorpe[*] hebben geramet[*] enen soen tusschen Uken Focken soen hoevetlinck tho Uldersum by der enen siden, und der meenheit[*] by der ander siden und dat ihn dusser wise, dat de borch tho Uldersum schall staen ihn orer vuller macht, also dat men suth (so)[*] wo dat geit mit Leer, und ist overst saeke, dat idt ovell ginge mit Leer, dat Godt vorbeden moet, so schall men dat bolwerck effenen, und dat steenhuiss und dat muirhuis schalt staen tho der hoevetlinge seggen vorgenoempte; und ock dat Uken wiff und oer suster unde syne knechte scholen ungemoiet wesen und ihn erer vullenmacht tho bliven und se tho holden, als eene guide fruwesname tho behoert. Item thom anderen, dat Uko vorgenante schall bruiken all dat erve, dat de Keensne[*] eer ye gehadt hebben tho synen besten und tho des sloetes behoeff tho Uldersum, und alle erve, dat Uke vorscr. gekofft hefft eder em angearvet iss, unde alle arve van syner fruwen wegen unde syne moeder wegen, und voert Keenes synes swagers arve und Etteke syner[*] swegersken arve; item alle gelavet gelt, betaelt, und alle gelavet guidt und syne huir. Item to den derden, dat alle de gene, de um synen willen myt em up den slaete tho Uldersum voerscr. wesen hebben, dat se ihn oer guidt sitten fry und velich, also se dat nhu vinden und dat se dat ore moegen bruiken, waer se dat hebben, und dat se vor gene sloete schoelen tehen, und van alle ansprake fry syn, de gescheen syn van den sloeten voerscr., und voert dat alle or guidt fry und velich schall wesen, dat sy replich oder unreplich. Item weert saeke, dat dat steenhuiss dalen[*] schulde, so schall men Uken huisfruwe vorgenante bringen mit all or guidt und reschup, dat up den sloete iss, waer se wesen will fry und velich. Dat laven wy Edzart, Eppo, Haio, Ailko und Ippo voerscr., laven und sweren wy mit upstavedes eedes ihn den hilligen sunder alle argelist und nie vunde, und des tho merer bekentenisse, so hebben wy Edzardt, Eppo, Haio, Ailko und Ippo voerscr. unse zegell laten hangen ahn dussen brieff int jaer unses Heren 1430, des frydages nha alle Gades hilligen, under Overledingerlandes zegell van Ippen wegen, des he nhu thor tidt bruikende iss.
