| Nummer:oub0282 | Datum:28. Okt. 1420 | Overlevering:Editie | Vindplaats:Ostfriesisches Urkundenbuch, I, S. 246, nr. 282 |
Ocko tom Brok erneuert abermals das schon früher wiederholte von Keno der Stadt Groningen und den Umlanden gegebene Friedensversprechen.
Ick Ocko to Broke, Awerk ende Emeden etc., in Oestvreeslant hoefftling, doe kunt ende kentlick allen luden myt dessen openen breve, dat ick vor my ende myne erffgenamen ende nacomelinge omme nutticheyt ende orber menen Vreeslandes hebbe angenomen ende neme an all sulke punten, vorwerden ende artikelen, als de brieff inholdet ende begrepen hefft, dar desse brieff dor getogen is, ende lovede den ersamen borgermeister ende rade in Groningen ende der meenre meente van Groningen de hoefftlinge, rechteren ende mene meente van Hunsege ende Fyfelge landen alle allsulke punten, vorwerden ende artikelen to holden als een guet kerstenman, als myn vader Keno, den God gnedich sy, vor besegelt ende gegeven hefft, ende ic nu nae in dessen selven breve besegele, veste ende confirmere, ratificere ende approbere vor my ende myne erffgenamen ende vor myne nacomelinge tot ewigen dagen to bliven sunder yeniger hande intreckinge ende argelist. In orkunde besegelt myt mynen segel beneden an dessen brieff gehangen. Ghegeven in den jar ons Heren dusent CCCC ende XX, up sante Symon ende Juden dach apostolorum.
