| Nummer:oub0281 | Datum:27. Okt. 1420 | Overlevering:Editie | Vindplaats:Ostfriesisches Urkundenbuch, I, S. 245, nr. 281 |
Sibet von Rüstringen versöhnt sich mit der Stadt Groningen und den Umlanden und schliesst ein Bündniss mit ihnen, worin er eventuell Hülfstruppen zu stellen verspricht.
Ick Sybet hoefftling in Ruestringe bekenne ende tuge mit desen openen breve, dat ick mit gueden berade, by consente ende vulborde mynre maghe ende vrende voer my, mynre erfgenamen ende nakomelingen, vrenden ende maghe, ende voer alle de ghene, de omme mynen willen doen ende laten willen ende daer ic mechtich byn of mechtic worden mach in tokomenden tyden, hebbe versoent ende versoene tegenwordich mit desen breve my mitten eersamen borgermesteren ende rade ende meenre meente in Gronningen, mitten hoefftlingen, richteren ende meenre meente van Hunsege, Fiyelge, Langwolt, Fredewolt ende Hummerkelanden tot ewigen dagen to, van aller schelinge ende twidracht, de myne voervaren voer ende ic nae in yeniger wijs mit hem in voertyden ende op desen dach, datum deses breves, hebben ghehat of hebben moegen. Voert so love ick Sibet vorscr. voer my, myn erfgenamen ende nacomelingen den vorscr. borgermesteren ende rade ende meenre meenten in Gronningen, den hoeftlingen, richteren ende meenre meente deser vorscr. landen, weert saeke, dat jemant were, de se verkorten ende bekrenken wolde in oeren heerlicheden, vryheden ende rechten, de se huden op desen dach hebben, besitten ende ghebruken, of anders mit ghewelde overvallen wolde, dat ic hem dat sal helpen keren ende wederstaen mit alle mynre macht, als ic van hem des vermaent worde, mit voerwarden, dat se mynre ende mynre vrende, de mit my reysen hem bystandich te wesen, kost op staen zullen, also wy over de Emese komen. Item so love ick Sibet vorscr. voer my, myne erfgenamen ende nakomelingen den vorscr. borgermesteren ende rade, hoeftlingen, richteren ende der meenre meente deser vorscr. landen ende stat, dat ick noch myne erfgenamen ende nakomelingen, of de ghene, de ick mechtich byn of mechtich worden mach, nemande ontholden en sal, de vyand is deser vorscr, stat ende landen, of de hem ende oere vrenden schade doet of doen sal uet mynen lande, in mynen lande of doer mynen lande. Item zo sullen de van Gronningen ende dese vorscr. lande ende lude na desen dage velich lyffs ende gudes by dage ende by nachte in mynen lande varen ende keren, oer hanteringhe ende komenscap (!) te doene. Item so sullen alle breve, de myne voervaren ende ick nae den vorscr. borgermesteren ende rade ende meenre meenten, hoefftlingen, richteren ende meenre meenten deser vorscr. lande ghegeven hebben blyven in hoerer vuller macht. Alle dese vorscr. punten love ick Sibet vorscr. voer my ende myne erfgenamen ende nakomelingen, voer myne vrende ende maghe, ende voer alle de ghene, de omme mynen willen doen ende laten willen, den vorscr. borgermesteren, raede ende meenre meenten in Gronningen, den hoeftlingen ende meenre meenten deser vorscr. lande, stede ende vast ende onverbroken to holden tot ewigen dagen to als een guet man sonder yenigherhande intreckinge, argelist ende nye vonde. In een orkunde der waerheit so heb ick Sibet vorscr. voer my, mynre erfgenamen ende nakomelingen, vrende ende maghe, mijn segel beneden an desen breeff ghehangen. Gegeven in den jaer ons Heren dusent vierhondert ende twyntich, op sante Symon en Juden avent.
