| Nummer:oub0274 | Datum:Hindelopen, 31. Mai 1420 | Overlevering:Editie | Vindplaats:Ostfriesisches Urkundenbuch, I, S. 235, nr. 274 |
Focko Ukena und Hayo von Larrelt als Bevollmächtigte Ocko's tom Brok schliessen mit Abgesandten der Stadt Groningen einen Vertrag über die in ihre Hände gefallenen Kriegsgefangenen.
Wy Focko Ukama, hoeftling to Lere, Haie van Larrelte, vulmachtighe sandeboden Ocken van den Broke, ende wy Eylike Onsta, Barwolt Ebbing, Hinric Beyer ende Focko ten Dijke, volmachtighe sandeboden ut de stad van Groninghen, bekennen ende tughen myt dessen openen plackerds breve, dat wy vrendeliken overdraghen siin myt mallic anderen van den vanghenen, de ons de almachtighe God ghegheven heved, in manieren, als hiir nae bescreven staed. In den eersten, dat wy sandeboden voers. de ghevanghen like een twe sullen setten, soe dat ellic effen manighen vanghenen hebben sal, de wy nu in dessen reyse samentlic ghewonnen hebben, of winnen moghen, by Godes ghenaden; ende ellic sal ziine vanghenen scatten, als he hogest mach, na redene, ende sal dat ghelt opboeren. Item soe wanneer de eersame juncker Ocko van den Broke, of de raed van Groninghen, rekeninghe begheren van mallic anderen van dessen voersc. vanghenen, ofte haere enich besunderlinghen van den anderen, soe sullen Ocko ende de raed voerscr. op ene bequeme stede bi mallic anderen komen, ende doen malken anderen rekenscap by haeren ede. Item voert, soe bykennen wy Focko Ukama ende Haye voerscr., dat wy hebben ontfanghen enen staf ende dre schenckvate van den abbat van Ludinghekerke voer vierhonderd olde schilde to pande, daer den van Groninghen half an gaet; ende desse voerscr. panden sal de abbat voerscr. lossen op sunte Merten in den winter naestkomende, of een maend daer na onbegrepen; ende wy Focko Ukama ende Haye voerscr. loven desse panden te lossen, ende de van Groninghen rekenschap van te doene, inden dat wy se brenghen velich to hues, ende bytalinghe van den halven ghelde. Ende desse voerscr. punten loven wy mallic anderen voerscr. stede ende vast to holden, sunder alle arghelist. Des toe enen oercunde, soe hebben wy Focke ende Haje, des eersamen Ocken van den Broke secreet, ende wy Eylike, Barwolt, ende Hinric voerscr. onse seghele, voer Focken ten Dyk ende voer ons, op spacium des breefs ghedrucked. Ghegeven to Hindelopen, in den jaere ons Heren duzend vyer hondert ende twintich, op den vrydach na Pinxster daghe.
