Die königlichen Abgesandten in Friesland schliessen Frieden zwischen dem Häuptling Sibet von Rüstringen und seiner Partei und dem Butjadingerlande.

Syfrid van Wemdingen ritter und Niclas Bontzlow des allerdurluchtegesten fursten und heren, heren Sigmunds van Gots gnaden Romischen konings etc. ambasiator vulmechtich in Vreesland gesand, bekennen und betughen mit denen openen breve, dat wy mit todonde und rade des eerwerdighen heren Rembertis van Norden, canoniks der kercken to Bremen und der ersamen und wysen heren Hinriks van Hasbergen burgermeysters, Herberts Duckel und Johans Vasmer raedmannen der stad Bremen hebben gemaket enen steden, vasten, velighen vrede tuschen den erliken Sybete hoftling to Rastringen, synre partyen und undersaten gheystlijk und werlijk: Nanken Durensen, Lubben und Memen Sybetes broderen, Eggen Heringes, Tanten Ummeldes und Umma des sulven Tanten sone und erer yeweliker partyen gheystlijk und werlijk an ene zyde, und den vromen beschedenen luden der gantzen meenheit der vijf kerspele to Butenjaden mit namen Blexen, [*] Waddenze, [*] Birhoven, [*] Langwerden[*] und Oldersen[*] und erer yeweliker partye gheystlijk und werlijk an de ander zyde, welk vrede anghan schal up dessen hudighen dach datum desses breves und waren und blyven schal went to sunte Jacobs daghe neyst komende, den dach all. Were over sake, dat bynnen dessen vorscr. vrede yenich inval edder gebreke scheghe, wo de to queme, des God nicht en wille, de ghenen deme dat gescheen were van welker partye de were schal dat der anderen partye claghen und witlik doen, und seholen dat dar na bynnen den neysten veerteyndaghen under zik in vruntschoppen oft in den rechten vorrichten, und dar mede schal desse vorscr. vrede nicht vorkrenckt edder vorbroken wesen. Men he schal yo bliven in synre vullen macht went up den vorscr. sunte Jacobs dach und den dach all, und wy Sybet, Nanke, Lubbe, Meme, Egge, Tante und Umma vorscr. bekennen in dessen sulven openen breve, dat wy den vorscr. vrede stede, vast und unvorbroken in guden truwen holden willen und mit hande und mit munde gelovet hebben heren Syfrid und heren Niclaze vorscr. to unses allergnedigesten heren heren Sigmunds Romeschen konings vorscr. handen sunder allerleye argelist. Und des to tughe der warheyt hebbe wy Sybet, Lubbe, Meme, Egge und Tante vorscr. unse ingesegele vor uns und unse partye up dessen bref gedruckt, der wy Nanke und Umma vorscr. mede gebruken, went wy up desse tijd sulven ghene ingesegele en hebben, und to noch mererer sekerheit hebbe wy samentlike gebeden de vorscr. heren Sijfrid van Wemdingen und heren Niclas Bontzlow, dat ze oek eer ingesegele by de unse up dessen bref hebben gedruckt. Gegeven by der Jaden up sunte Johannis dach decollacionis int jaer unses Heren dusent veerhundert und achteijn jar.

x

x

Fonds	Ostfriesisches Urkundenbuch, I
Fol.nr.	S. 218
Nr	260
Olim	Nach dem Orig. im Archive zu Bremen.
Jaar	1418
Datumcode	DecJoh

x

x

Commentaar	Von den aufgedrückten sieben grünen Wachssiegeln sind die meisten gänzlich zerstört. Ziemlich erhalten ist nur 2) das Siegel des Nicolaus Buntzlow, ein vorwärts blickender lockiger Kopf, Umschrift:... cancel . . , 3) ein rechtsaufgerichteter Löwe, Umschrift: s. Sybod . . . . , 5) ein linksaufgerichteter Löwe, Umschrift: S. Memon ...., 6) ein rechtssehender Adler, Umschrift: ....Heringes.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 260