| Nummer:oub0252 | Datum:Aachen, 9. Dez. 1416 | Overlevering:Editie | Vindplaats:Ostfriesisches Urkundenbuch, I, S. 206, nr. 252 |
König Sigismund kündigt den Friesen die Ankunft seiner Abgesandten und deren Vollmacht an, um in seinem Namen mit ihnen über ihre Prärogativen zu verhandeln und die schwebenden Streitigkeiten zu schlichten.
Wi Sigismundus van Gottes gnaden Roemsche keiser (so), tho allen tyden merer des rikes und tho Ungern, Dalmatien, Croatien etc. koninck, erbeden allen und itlichen prelaten ihn wat weerden se sinnen, unsen lesen andechtigen, und dartho allen und itlichen greetmannen, hoevetlingen, landtluiden, edelen und unedelen ihn Oistfrieslandt und Westfrieslandt und dartho allen und itlichen anderen Fresen gemeenlichen under worden genoempt, und waer de geseten sint, nemant uthgenamen, unses unde des hilligen rikes leven getruwen, unse gnade und alle guidt. Leven getruwen, wy hebben vornamen und synnen des ock egentlich underwiset worden, dat gi van oldes heer van de hillige karcke gefriet sint, und ahn dat hillige rike und anders nergent hen gehoert, und darumme ju allen und enen ideren besunderen by den hilligen rike tho beholden und van des hilligen rikes wegen gnedichlichen tho beschutten unde tho bescharmen, als wy tho doen schuldich sint und billich doen schulden; so sende wy tho ju den edelen Nicolaus Buntslaw, cantzeler des furstedohems tho Breslow, unsen raedt unde lieven getruwen, und den ersamen meister Hindrick Clant, licentiat ihn geestlichen rechte und canonick tho Colne, [*] unsen cappellaen und lieven andechtigen, unse menung und willen mit ju tho reden unde uthtodragen, woill egentlich underwiset, und begeren van ju mit ernste und willen, wat desulve Nicolaus Buntzlow und meister Hindrick mit ju van unsentwegen unde in unsen namen reden und uthdragen weerden, dat gi dat ihn allen stucken und puncten vullenkomentlichen geloven scholen, alse offte wy sulvest ihn egener persoen de sulven saeke und stucke alle gemeentlichen und elck besunder lyfflich mit ju geredet und uthgedragen hebben. Gegeven uth unse stadt Aken nha Christi geboert veerthien hondert jaeren, ende daer nae in den sesthienden jaere, an den naesten midweecke nae onser lieven Vrouven dach, als sy wert ontfangen, onsen rycke des Hongerschen etc. in den dartichsten jaere, ende des Roomschen in den sevenden jaere.
