| Nummer:oub0249 | Datum:21. Okt. 1415 | Overlevering:Editie | Vindplaats:Ostfriesisches Urkundenbuch, I, S. 204, nr. 249 |
Friedensvertrag zwischen Keno tom Brok und der Stadt Groningen.
Wy Keno to Broeck, to Awerck ende Emeden in Oestvreeslant, borghermestere ende raed in Groningen, bekennen openbaer voer allen gueden luden, die dese breef sien of horen lesen, dat wy mit malcanderen ons hebben liefliken ende vrentliken wal verdraghen van saken weghen, daer wy to samene omme tot Emeden hebben ghewesen tot vrentscap ende to nutticheit onser ende menen Vreeslande, op dat wi allen oerloges ende twydracht onser tusschen, in tokomenden tyden moghen ontslaghen wesen in manieren, als hyr na bescreven staet. Int eerste, dat ic juncker Keno noch myne nakomeninge der stad van Groningen, Honseghelande ende Fyvelghelande, in oeren rechte ende begripe niet hinclerlic wesen en sal, ende dat ic noch myne nakomeninge ghene lantschattinge mene te hebben noch hebben en wil tot gheenre tyt, noch ghene slote te maken, noch maken te laten in den vorschreven landen; mer heft yenich man op yemant te spreken in den vorschreven landen, als Honseghe ende Fyvelghe, de sal den anderen anspreken mit lantrechte ende vol te done na lantrechte; ende des ghelikes weder te done den ghene, die gheseten syn onder jonker Kenen ghebede; ende dieghene, die ut jonker Kenen landen syn, stadrechtes te bruken in der stad van Groningen over die ghene, die sie anspreken mit stadrechte. Item alle de ghene, die woenachtig syn in Honseghe oft in Fyvelghelande, den redscop of recht met rechte tobehoren, oer recht mogen voeren, als sie em mit rechte tobehoren na inholt oers redgenbokes, mit vorwarden, dat de vorscreven redgen[*] of rechten ghenen menschen onrecht doen en sullen. Ende weert, dat die redge of rechters yenighen menschen unrecht deden of niet rechten en wolden, des men waerlike betughen mochte, so moghen die ghene, den onrecht gedaen wort, of die ghene, den men niet rechten en wil, oer saken beropen to Groningen in den warve[*] by vyf olden marken. Item ghene husinge of were in den vorscreven landen niet dicker te maken, dan van dren muerstenen, ende die graft van dren roden[*] wyt, oft daer en bynnen. Item dat guet, dat yenich man ghenomen heft van den van Groningen, dat lude ghedaen hebben ut Honseghe of Fyvelghe, utgheseghet die in jonker Kenen reyse weren synt ter tyt dat Groningen gewonnen woert, dat sal men richten der stad van Groningen. Ende desghelikes sal men quyt schelden al bedwongen lofte, eede ende ghelt, dat ghelovet is in Honseghe of in Fyvelghe, ende dat slot to den Delfsyle neder te sliten.[*] Terstont hyr mede so sal elc man velich wesen lives ende guedes te varen ende te keren, to water, to lande, by daghe ende by nachte, ende onser negheen ghene bekummeringe noch besettinge onder ons te doene, anders dan den ghenen, die de schult selven ghemaeckt hebben of oer erfghenamen. In enen tughe der waerheit so heb ick joncker Keno myn seghel an dessen breef ghehangen. Ghegeven in den jaer onses Heren dusent vierhundert ende vijftien, up elven dusent maghede dach.
