| Nummer:oub0059 | Datum:19. Juni 1346 | Overlevering:Editie | Vindplaats:Ostfriesisches Urkundenbuch, I, S. 62, nr. 59 |
Vertrag zwischen dem Ems-, Brokmer-, Mormer- und Oberledingerland und dem Bischof von Münster, worin die Parteien je sechs Schiedsrichter zur definitiven Beilegung der zwischen ihnen streitigen Punkte ernennen.
Wi her Ludwigh van der gnade Godes eyn biscop tho Monstere und Albert unse droste up den Nyenhus in Emeslant up eyne sid, unde wy Vresen ghemeyne van Emesehenlande, Brocmannerlande, Mormannerlande und Overlederelande[*] up ander sid, doit kundich allen den ghenen, de dessen breef sied unde huret lesen unde betughet openbare in dessen kegenwordgen breve, dat wy alle der twyst, scelinghe und orlages, dat tuschen uns am beden siden hertho heft gewesen und nog ys, sint geghaan up erachttighe lude hern Brune van Buren und hern Everde van Vechtorpe, doomheren van Monstere, hern Otten van Bramhorne, hern Iohanne van Tunen riddere, hern Bernde Travelmanninch, hern Hermanne Dusas raatmanne to Monstere, Folkart Beningha, Reydolph van Cirquerum, [*] Hayted van Husum, [*] Aylde van Suderhusum, [*] Ludwart van Emmede und Hyske van Lerlethe, [*] also dat se der vorgenomden stucke soln mechtigh sin tuschen uns to slytene und to zonene in vrentscap oft in rechte, tuschen sunthe Iohannes daghe to middensomere alse nu tokomen sal, went over eyn iar, also, ofte in der tyd des vorgenomden iares, dar id binnen steet in vrede, in der wise als de vorgenomden lude gedegedinghet hebt unde breve up gegeven sint, tokort wurde dat se mechtegh wesen soln den selven vrede also lange to verlengene alse se to rade werdet, unde de vorgenomdem stucke zonen moghen in minne ofte in rechte, alse hir vore gescreven ys. Were ok dat also dat in ienighen vrede des ersten ofte des lesten, alse dar de breve sint up gegeven ienigerhande dink kegen den vrede alrede gesehen were, ofte naa der gave desses kegenworghen breves van unser twyer partie geschee, dar unser eyn den anderen schult umme gheve ofte gheven wolde, des soln desolven tweleve vulle maght hebn to schedene in mynne ofte naa rechte. Were ok dat also, dat van dessen tweleven dar es togegan ys, ienigh storve binnen desser tyd, so magh de partye, dar he uth ghestorven ys eynen also guden sekeren man weder setten in de stat des doden als de ghene was de dar verstorven ys. In eyn orkunne unde merre vestnisse alle der vorgescerevenen stucke so heb wi her Ludwigh, eyn biscop to Monstere, und Alberth de droste vorgenomd, Emeschelant, Brocmannerlant, Mormannerlant und Upledegerlant unse ingesegle gehanghen to dessen breve. Desse bref ys gegheven naa bort unses Heren Godes dusent iar dryhundert iar in den ses und vertigesten iare, des maandages naa sunte Vites daghe.
