Ayleko Ferhildema en enige andere hoofdelingen belenen Pieter Reynerszoon tot beloning van zijn goede diensten met het goed ten Post, terwijl hun leenheer, hertog Albrecht van Beieren, zijnerzijds deze belening bevestigt en goedkeurt.

Wy, Ayleko Ferhildema, Reyner Eysingha, Haye Wibben, Omeko Snelgherszoen, Tammo Gockenga ende Menno Howerda doen cond allen luden, dat wy om mennigen goeden trouwen dienst, die ons ghedaen heeft ende, oft God wil, noch doen sal Pieter Reynerszoen, denselven Pieter gegeven hebben ende gheven mit desen brieve dat goed te Post, gheleghen in Fiwelgerland tusschen der Lauwerze ende der Eemse in Oestvrieslant, mit sloten, mit luden, mit herlicheden hoge ende laghe als daertoe behoren, te houden van ons ende van onsen nacomelinghen Pieter voirnoemt ende sinen nacomelinghen tot enen onversterfliken erflien in alre manieren als wy dieselve goede onsen lieven ghenedighen heer, hertoge Ailbrecht van Beyeren, grave van Henegouwen, van Hollant, van Zeelant ende heer van Vrieslant, upghedraghen ende quijtghescouden hebben ende weder van him te lien ontfaen, als sijn beseghelde brieve ende hantvesten inhouden , die wy van him daerof hebben. Ende waer Pieter voirs. gheen wittachtige gheboerte en hadde van sinen lyve, so mach Pieter voirs. die voirs. heerlichede, slote ende goede in sinen levende live besitten ende maken te comen mit sinen testamente of openen brieven of up dieghene, die hi die gheven of gunnen wille na sijnre doot een of meer. Ende die sullen dieselve slote, heerlichede ende goede van ons te lien houden in alre manieren als wy die Pieter voirs. verliet hebben. Ende gheloven Pieter voirnoemt te houden ende te starken in den voirs. goeden ende heerlicheden als heren horen leenmannen sculdich sijn te starken. Ende daerof sal hi ons weder dienen als een leenman sinen lienheer sculdich is te doen. Ende want wy Pieter voirnoemt gheloeft hebben ende gheloven alle dese voirscreven pointen te houden ende te voldoen, soe hebben wy desen brief open besegelt mit onsen segelen, ende om die meerre sekerheit willen ghebeden onsen lieven ghenedighen heer, hertoge Ailbrecht voirnoemt, dair wy die voirs. heerlichede ende goede of te lien houden, dat hi sijn ghenade ende goede gunste hiertoe keren wil ende dese verlyinghe vestighen ende confirmeren also alst an him comt ende desen brief open voren mit ons besegelen. Ende wy Ailbrecht, bi der ghenaden Goids palensgrave upten Rijn, hertoge in Beyeren, grave van Henegouwen, van Hollant, van Zeelant ende heer van Vrieslant, om bede willen ende versoecs onser goeder lude ende leenmannen voirnoemt, hebben vestiget ende confirmeert, vestighen ende confirmeren mit desen brieve alsulke ghifte ende verlyinghe, alse onse voirnoemte goede lude ende mannen gegeven ende verliet hebben Pieter voirnoemt van den sloten, goeden, luden, heerlicheden ende landen van Post, die sy van ons te lyen houden, ende geloven denselven Pieter mit onsen lienmannen voirnoemt te houden ende te starken in den voirs. goeden in alre manieren als dieselve onse lienmannen voren gheloeft hebben. Ende in kennisse der waerheit hebben wy desen brief open voren mit onsen goeden luden ende leenmannen voirnoemt besegelt mit onsen seghel. Gegeven des Saterdages na onser Vrouwendach Nativitas anno XCVIII.

x

x

Fonds	Oorkondenboek Groningen en Drenthe
Nr	1009
Olim	Naar een register getiteld Oostvrieslandt (A), fol. XVIvo, in het rijksarchief te 's Gravenhage.
Jaar	1398
Datumcode	SpNatMar

x

x

Materiaal	papier

x

Edities	P.J. Blok e.a., Oorkondenboek van Groningen en Drente, II (Groningen 1899), nr. 1009.