De drie steden Deventer, Kampen en Zwolle verbinden zich om aan Reynold van Coevorden, ingeval hij afstand doet van zijn rechten op Drente en Coevorden, de hem van wege de Bisschop van Utrecht toegezegde som te zullen betalen.

Wi, burgermester, scepene, rade ende ghemeyne burger der stede Deventer, Campen ende Zwolle, doen cond allen luden mit desen apenen brieve ende bekennen voir ons ende voir alle onse erven ende nacomelingen, weerd dat Reynoldt van Covorde alzulke vertichnisse van Covorde ende van Drente dede, alz die hogeboerne vurste onse lieve ende ghenedige here, die hertoge van Gelre ende van Gulich ende greve van Zutphen, in eenre zwonen tusschen dien eerwerdigen in Gode vader ende here, onsen lieven heren heren Frederic, bisscop tUtrecht, ende sinen gestichte an die eene zijde, ende Reynolde voirs. ende sinen vrienden an de ander zijde alse van den zaken van Covorde ende van Drente gesecht heeft, dat wij , burgermester, scepene ende raede ende ghemeyne burger der voirg. steden Deventer, Campen ende Zwolle, betalen zullen oft betalen doen Reynolde van Covorden ende sinen rechten erfgenamen gebreke sijns XVM goede oelde guldene schilde, goed van golde ende van gewichte, monte des Roemschen keysers of des conincx van Vrancrijc of gelijc goed ende werd payment dairvoer an golde in vrij ende zeker behalt Reynolts of sinre erfgenamen voirg., alsoveer alse zijt ontfangen willen bynnen der stad van Zutphen als op dien XIIII dach in Meye, die wesen sal in den jaer ons Heren MCCCC ende twie nu naesttocomende, also dat wy die betalinge der XVM schilde doen zullen Reynolde vorg. off sinen erven, als voirs. is onvertoget, also vroech, als hi of sine erfgenamen ons die voirscreven vertichnisse ende vestinge van Covorde ende van Dnenthe mit alle hoeren tobehoeren ende van zulker ansprake ende toseggen, als hij ende sine alderen dairan gehadt mochten hebben, ende hi ende sine rechte erfgenamen dairan hebben mochten, mit besegelden brieven als dair behorlijc to sijn gedaen, gelevert ende overgegeven hebben, sonder argelist. Ende der vertichnisse ende vestinge en soelen wij ons niet weygeren an te nemen ende die brieve dairaf ontfanghen, wanneer die gescheen ende gemact werden, als redelijc en gewoenlic is. Ende wij verwilkoern, weerd dat in der betalinge der XVM olden schilde van ons wegen enich gebrek vele, dat dairvoer Reynoldt ende sine erven gebreke sijns mit horen vrienden ons ende onse goede erven ende nacomelinge ende onser erven ende nacomelinge goede, die wij dairvoir verbinden, mogen panden ende angripen, onverbroeken tiegen ons die te holden ende na hem die to nemen ende horen orber dairmede te doen sonder ons wederseggen, thent hem dairmede alentlike van den voirg. XVM olden schilden ende van allen bewiseliken schaden, dien zij om gebrek der betalinge voirs. geleden hadden, were genoech geschiet, alentlich ende altemael sonder argelist. Alle dese voirs. punten ende voirwerden hebben wij gesekert ende geloeft, sekeren ende laven in goeden trouwen voir ons, onse erfgenamen ende nacomelingen vast, stede ende onverbreclich te holden ende te voeldoen in allen manieren alse voirg. is. Mer hiraf is te verstaen, weerd dat Reynold van Covorden ende sine erfgenamen gebreke sijns die vertichnisse ende vestinge van Covorden ende van Drenthe mit alle horen tobehoern voirs. niet en deden ende voltogen in alien manieren alse voirs. is, dat dan dese brief ende lofnisse van den XVM olden schilden voirs. claerlike doet ende machteloes zullen wesen, alle argelist hyr utgesproken. In orkonde des hebben wij onser drier voirg. stede segele an desen brief doen hangen. Int jaer ons Heren MCCCXCVII des lesten dages in Meye.

x

x

Fonds	Oorkondenboek Groningen en Drenthe
Nr	957
Olim	Naar een afschrift uit de 15de eeuw in het Diversorium fol. 194, in het gemeentearchief te Kampen (Reg. I, no. 323).
Jaar	1397
Datumcode	3105

x

x

Materiaal	papier

x

Edities	P.J. Blok e.a., Oorkondenboek van Groningen en Drente, II (Groningen 1899), nr. 957.