Deken en kapittel van de Dom te Utrecht verklaren aan Swanelt van den Hove en haar zonen in pacht te hebben gegeven een derdedeel van het gerecht en de heerlijkheid te Groningen en Selwerd met Wold en Gho.

Allen luden, de dezen breef sullen zien of horen lezen, wij, deken ende capitel ten Dome tUtrecht, maken kond ende kenlich, dat wij in pachte
ende in huerwere ghegheven hebben ende gheven mit dezen breve Godevaerd van den Hove voer ende Johan, sinen broder, na hem ende Zwanelde, horer
twier moder, na hem beyden tot hore drier lieve, also langhe alse enich van hem drien levet ende nyet langher, dat derdendeel van allen onsen
weerliken gherichte ende heerlicheyt hoghe ende leghe to Groninghen ende to Zelewart met Wolde ende met Gho ende myt allen horen tobehoren, also
als de ons ende onser kerken ten Dome vorseyt tobehoren ende zie Godevaerd van den Hove, Godevaerd ende Johans vors. vader, van ons in pachte
plach to hebben, uetghenomen tyns, tyenden ende renten ende ander erfnesse als wy daer legghende hebben, welke in dezer vors. pacht nyet
begrepen en ziin, elkes jaers um twe marc fiins ende puers silvers van ghewichte der stad van Utrecht ofte de weerde daervoer an paymente, dat
ghenge ende gave is in der tiid der betalinghe, de ons Godevaerd, Jan ende Zwanelt myt ghesamender hand ende elc bijsunder sculdich sullen wezen
also langhe als zie of enich van hem drien leeft ende die zie ons betalen sullen jaerlix bynnen onser kerken van Utrecht sunder enighe
afkortinghe oi vermynringhe ons voerseyden pachtes om enich commers wille of enighe lettenesse, de hem in den vorseyden gherichte ende
heerlicheyt ghescheen mochte, of om anders enighe saken up hores selves cost, angest ende arbeyt tot sente Peters misse ad Cathedram nu
naestkomende of bynnen eenre maend daerna unbegrepen ende also voerd jaerlix. In alsulken vorwarden ende manyren: waert sake dat ons de vorseyde
pacht al alinghe up sinen daghen als vors. is van hore weghen nyet betaelt en worde, so vellen zie algader, ghemeenlike ende onghescheyden of de
van hem in der tiid levede, van der vorseyder huerwere ende van allen rechte, dat zie of hore enich hadde of hebben mochten an der heerlicheyt
ende gherichte voerghenoemt, also verre als wy wolden ende anders nyet, behoudelich ons nochtan des versetens pachts, de ons onbetaelt ware.
Voerd sint vorwarden, dat zie noch hore negheen en sullen noch en moghen hore pachtrecht ende hurewere des gherichtes en der heerlicheyt myt
horen tobehoren vors. vorsetten noch versellen noch verkopen , noch in gheenrehande manyeren an yement anders brenghen onder der penen van
vervallinghe vors., ten ware by onsen consente ende wille; ende waneer Godevaert, Jan ende Zwanelt vors. nyet langher en ziin, so komen die
gherichte ende heerlicheyt myt horen tobehoren vors. weder vrij ende loes an ons ende onse kerke ten Dome vors. onzen vrien willen daermede to
done sunder yemens wedersegghen. Oech zint vorwarden, dat Godevaerd, Jan ende Swanelt ende een eghelich van hem drien ons ende onzen boden
vorderlich ende holpelich sullen wezen tot onsen renten, de wij daer legghende hebben, in to manen ende to vercrighen na horen vermoghen zonder
al arghelist. In orkunde des briefs beseghelt met onses capitels zeghel. Ghegheven int jaer ons Heren duzent drehondert twe ende neghentich up
sente Matheus avend.

x

x

Fonds	Oorkondenboek Groningen en Drenthe
Nr	837
Olim	Naar het authentiek afschrift in de oorkonde van 27 October 1392, no. 842; zie aldaar.
Jaar	1392
Datumcode	vMatthe

x

x

x

Materiaal	papier

x

Edities	P.J. Blok e.a., Oorkondenboek van Groningen en Drente, II (Groningen 1899), nr. 837.