Burgemeesters en raad van Groningen verklaren, dat heer Tyese, vicaris der Akerk te Groningen, aan de voogden van die kerk een jaarlijkse rente heeft verkocht en overgedragen.

C. Wi, borghermeestere ende raed van Groninghen, doen cundich allen luden met desen openen brieve, dat
haer Tyese, een vicarius van onser Vrouwen kerke ter A, bi haren Otten rade Folkerdinghe ,
curetes, ende oec bi anders goeder lude rade van den voers. kerspele vercoft hevet thvalef scillinghe rente paymentes, als tot Groninghen ghanc
ende ghave is, den vogheden van der voers. kerken tot der kerke behoef te nemen eweliken elkes jaers, als een stadrecht is, ut der stede, daer
Jacob de Ridder op woent, voer ene summe van ghelde, de haren Tyesen voers. vol ende al betaelt is. Ende dese voers. thvalef scillinghe rente
droech haer Tyese voers. op bi den voers. goder lude rade den vogheden voers. vri ende quite met allen rechte ende met allen eyghendom eweliken
to bruken ende to besittene. Hier is toghesproken , dat haer Tyese voers. jof een ander vicarius, de na hem comen mach, dese voers. thvalef
scillinghe rente weder copen mach met thvalef marken paymentes als voers. is, wanneer hi wil. Dese stede is gheleghen in de zuutzide van der
Catripe, daer der voers. vicarien erve an beyden ziden gheleghen is. Dat orcunden wi met onser stad zeghele. Ghegheven int jaer ons Heren dusent
drehondert vier ende zoventich op sinte Paulus dach Conversio, do Herman Catere, Lubbert Sickinc Gheert Lewe, Otte Polleman, Wycbolt
Maurissinghe ende Wycbolt Evardes soen borghermeestere waren onser stad.

x

x

Fonds	Oorkondenboek Groningen en Drenthe
Nr	614
Olim	Naar het origineel in het rijksarchief te Groningen (Reg. 1374, no. 7), hoog 12,5, breed 25 cm. Ook gedrukt bij Driessen, blz. 696.
Jaar	1374
Datumcode	ConPau

x

x

x

Commentaar	Het zegel is afgevallen.

x

Materiaal	papier

x

Edities	P.J. Blok e.a., Oorkondenboek van Groningen en Drente, II (Groningen 1899), nr. 614.