| Nummer:ugk098 | Datum:16. Nov. 1496 | Overlevering:Original | Vindplaats:Grimersumer Kiste, inv.nr. 098 |
Der Häuptling Wyart Aepkena zu Loppersum tauscht mit Enno Alricksna zu Manslagt Ländereien aus.
Witlick unde apenbaer zy allen denghenen, de dussen breeff zeen off horen lezen, se zyn gheestlick off wertlich, wo dat wy Wyart Aepkena, hovelinck to Lopsum, unde Enno Alricksna to Manslacht hebben gemaket een ewich unde erfnisse-weslinghe van summige erve, als hyrna bescreven steyt. So bekenne ich Wyart vorgescr., dat ik geve dussen vorbenompt Enno achte graze landes, een schaepsgras myn, in Hemsche landt, de soven graze gekofft van Gaiko Eskelsfna[*] to Manslacht unde vyff scaepsgraze in Weylstyske, gehofft van Hoiko. Des ick Enno Wyart, hoeschupp, weddergeve vyff demdt landes to Lopzum in zalige Emma fen, dar dat herschup an hevet veer up de oesterzyde, unde in desulffte fen hefft noch een demdt geervet van Eile Nonnena zaligher dechtnisse; welker landt van beyden syden wy willen malkanderen leveren vor uns unde unse vrunden, geboren off ungeboren, also dat een ywlick mach zyn landt gebruken, vorhuren, verwesselen, verkopen, vergheven, zyn orber, nutticheyt darmede to doen, alle archelist, nye vunde, hulprede, behende toghe, de dusser weslinghe iffte breve muchte hinderen, uthgesecht. Hyrto zynt geropen tuchwerdighe lade, als be name her Haytet, kerckher to Voerletz in Brockmerlandt, Ocko Beerlena[*] to Lopsum unde anders goder lude genoech. To groter bekantnisse der waerheyt, so heb ick her Haro, kerckher to Lopsum, am bede wille dusse erlike perzoene baven dickgnant, myn warafftich leben ifft ingezeghel hanghen beneden an dat spacium dusses breves. Int jaer unses Christi Hiesu (!) na zyner mylder gebort, als men screeff Mo CCCCo XCVIo, des mydwekes vor sunte Elyzabeth.
