| Nummer:ugk046 | Datum:3. Jan. 1469 | Overlevering:Original | Vindplaats:Grimersumer Kiste, inv.nr. 046 |
Haytet Alderzna verkauft dem Häuptling und Propst Aild Beninga eine Warfstätte und einen Garten.
Ick Haytet Alderzna, borgher to Westerhuzum, do wytlyk ende kundich allen ersamen goeden luden, de dussen breff zeen edder horen lezen, wo ick hebbe vorkoeft vryes koepes Ailt Beningha, hoeftlyng[*] tho Grymsum unde proest to Hint, enen weerf ende tween[*] myt syn thobehorynghe, daer Teyte Hepsna hues up steyt, de gheheyten is Albret Abyngha heert, ende my Haytet vorscr. angheerwet is van myner moder weghen, vor ene summe gheldes, als 20 Ar. gulden, de my Haytet vorghescr. vul ende wael betalet is den ersten pennyck myt den leesten; daerumme so scheide ick Haytet unde myne erven Aylt Beninga unde syne erven dusses werf vry ende quyt vor al anspracke, so dat Aylt vorghescr. dusses vorghescr. werff brucken, verkopen, vorwesselen, synen vryen wyllen daermede to doen. Hiir an unde over hebben ghewezen her Haytet, vycarius to Grymsum, unde Abeko Egghena darsulves[*] unde Francko ende Meno, woenaftich to Westerhuzum. In een oerkunde dusser waerheit so heb ic Haytet vorghescr. ghebeden mynen kercheren, heren Tydken to Westerhuzum over my dussen breef tho bezegelen, unde ich her Tydeken vorghescr. umme bede wylen Haytedt (hebbe) mynen inghesegelen[*] an dussen bref ghehangen. Int jaer unses Heren MoCCCCoLXIXo, ghescreven des dynxdaghes vor den hillighen dre konynghen.[*]
