| Nummer:oub0048 | Datum:Groningen, 8. Sept. 1319 | Overlevering:Editie | Vindplaats:Ostfriesisches Urkundenbuch, I, S. 44, nr. 48 |
Vergleich zwischen dem Komthur des Johanniterhospitals in (Burg-)Steinfurt und den friesischen Johanniterkommenden.
Universis Christi fidelibus presentia visuris et audituris, frater Robertus, Dei patientia abbas monasterii in Selwerdt, [*] Ludolphus, dominus de Gronebeke, prefectus in Gronyngen, frater Eppo, rector ecclesie in Wynsum, [*] Boyo, rector ecclesie in Sawert[*] et Rodolphus, dictus Reding, civis in Gronyngen, salutem et cognoscere veritatem. Ad singulorum notitiam, tam presentium, quam futurorum, cupimus pervenire, quod materia dissensionis, iam dudum. ventilata inter venerabilem virum, fratrem Hinricum de Selbach, magistrum seu commendatorem, cruce signatum, domus sancti Iohannis hospitalis Iherosolymitani in Stenfordia, et conventum ibidem, ex parte una, et commendatores et conventus domorum Frisie sancti Iohannis eiusdem ordinis, scilicet Warfum, [*] Wytwerdt, [*] Aaesterwerum, [*] Fynserwald, [*] Wymaria, [*] Gommegum, [*] Holse, [*] Harsle, [*] Bowkesete, [*] Abbyngearve, [*] Bure, [*] Thyuchen, [*] Hove, Wyckleesen, [*] Langewick, Vredehorna, Buyrle, [*] Bokeleske, Langeholt[*] et Lethemuda, [*] ex altera, in nos compromissa, compromisso vallato pena centum marcarum sterlingorum, terminavimus in hunc modum. Primo, quod quilibet commendatorum, domorum et conventuum predictorum renunciaverunt omnibus actionibus, literis papalibus et instrumentis aliis obtentis, quibus utrobique quilibet, per se vel coniunctim, causam suam possent aliquo modo promovere et defendere contra alium, vel alios, hinc et inde. Deinde commendatores Frisie domorum sancti Iohannis predicti, cessantibus aliquomodis exactionibus personarum, de novo ab eisdem recipiendarum, et equorum decedentium commendatorum domorum sancti Iohannis ibidem, quadraginta quattuor marcas sterlingorum, marcam duodecim solidis sterlingorum numerata, Turonensi grosse pro tribus denariis sterlingorum computando, dabunt in subsidium in elemosinam terre sancte, annis singulis, magistro seu commendatori Stenfordie seu conventui ibidem, et eius successori vel vices suas gerenti in hac parte tempore visitationis, quod erit post festum Iacobi apostoli omni anno, quum magistro Stenfordie predicto melius dinoscitur convenire. Item magister sive commendator domus Stenfordie relinquet electionem novi commendatoris fratribus domorum sancti Iohannis per Frisiam, de maiori parte fratrum canonice faciendam, et per ipsum magistrum Stenfordie postmodum confirmandam. Item si super electione commendatoris nequiverint concordare, magister Stenfordie, cum maiori et saniori parte fratrum, electionem celebret, prout ipsis et conventui videbitur salubrius expedire. Item si quis commendatorum domorum Frisie predictarum inutilis fuerit, conventu conquerente, probata eius negligentia, de consilio magistri Stenfordie, vel eius vices in hac parte gerentis, et voluntate sanioris partis conventus, commendator alius assumetur. Item magister seu commendator Stenfordie, vel eius vices gerens, cum septem personis, et totidem equis ad maius veniet visitando, sed commendatores et fratres domorum Frisie ipsum magistrum vel eius vices gerentem, quibus scripserint vel demandaverint, loco, quo occurrent, recipient, adducendo reverenter, prout condecet, et benigne, et, pro ipsius procuratione intrandi terram et exeundi, quilibet commendatorum domorum Frisie predictarum exsolvet solidum Monasteriensium denariorum eidem. Harum autem literarum tria sunt paria, quarum unam habet magister Stenfordie seu conventus ibidem, que sigillata est sigillis commendatorum domorum sancti Iohannis Frisie predictarum, cum sigillis arbitratorum predictorum. Aliam habent conventus domorum Frisie, seu conventus ibidem, que sigillata est sigillis conventus Stenfordie, cum sigillis arbitratorum predictorum. Tertia vero prefecto in Groninge relinquetur. Insuper adiectum est, quod quicunque ex commendatoribus supradictis ipsam compositionem violaverit, vel observare noluerit, in centum marcis sterlingorum nobis obligetur, vel qui ex nobis superstes fuerit in hac vita, sed medietas de centum marcis cedet parti, contra quam compositio violatur. In cuius rei testimonium perpetuo duraturum, sigilla nostra presentibus duximus appendenda, et commendatoribus ac conventibus Frisie supradictis contradenda. Actum et datum Gronynge, anno Domini Mo CCCo decimo nono, in die nativitatis Marie virginis gloriose.
