Graf Adolf von Oldenburg leiht von seiner Schwester Irmgard 800 rheinische Gulden.

Wij Alff, tho Oldenborgh unde Delmenhorst greve, enkennen unde doen kundt openbaer in desseme unsseme breve vor allesweme, dat wij der eddellen unde wolgebornen Ermegharde, to Oldenborgh unde Delmenhorst dochter, unsser besunderen leven suster, rechter wytlyker schuldt schuldych syn achtehundert goldene Rynsche gulden, gudt van golde unde swaer genoech van gewychte, so to Bremen vor der wesselle ghynghe unde gheve synd, de uns unse leve suster fruntligen uppe unssen eghenen loven nae gewantnysse to hulpe unsser gefengknysse gelenth heft, de wy erer lefte, myd deme ersten wij konen, scholen unde wyllen to erer genoghe sodane achtehundert golden gulden vorben. in ener helen summen fruntligen woll betalen. Wer ok unsser leven suster in desser betalynge jenych gebrack schege, wo dat to qweme, dat mach de erben. unsse leve suster van uns manen ofte manen laten myd geystlykem ofte werlykem rechte, wo eer dat gedelykest unde beqwemest ys sunder jenygerleye insaghe ofte ovelen moed, edder jemant van unsser wegene; wer ok overst, dat wij nae den wyllen Godes van dodes wegene vorfellen, dat God lange vryste na synen wyllen, oer desse betalynge unsser leven suster gelestet unde gescheen weer, so wysen wij ere lefte unde befestyghen se wedder in alle unsse nalaten gudt, nomptlick den Borchford myd deme kerspelle to Westerstede, [*] dat sy den rede gelt, klenode unde alle wes wy naelaten, bewegelych unde unbewegelych, ofte woer wy des heben, buthen ofte bynnen landes, so lange dat unsser leven suster sodanne achtehundert golden Rynsche gulden degher unde all to eren wyllen woll vornoghet unde betalet syn. Alle vorg. stucke unde articule loven wij Alff etc., greve vorb., unsser leven suster Ermegharde vorbenomed in guden truwen by unsser ere stede, vast unde unvorbraken to holden sunder argelyst. Tho orkunde unde mherrer bekantnysse heben wy unsse rechte ingesegell wytligen heten hangen tho desseme breve. Anno Domini etc. LXXX^o septimo, ame dinxstedage in den Pynxsten hilligen dagen.

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	1266
Jaar	1487
Datumcode	MpPentec

x

x

x

Commentaar	Abhängendes Siegel erhalten.

x

Edities	Editie naar dit exemplaar: oub1185.