Der Pfarrer Hermann in Esklum beurkundet den Grundstücksverkauf des Wessel Tetkens an die Kommende Muhde.

Ick her Herman, kerker tho Escklum, entkene unde betughe appenbaer in dussen appene breve voer alzweme, wodanewyes yn myner jegenwordicheyt Wessel Tetkens, unse kerspelman, ys overeyn ghekomen myt den erwerdighen heren, heren Gotzen, commendur tho der Mude, eynes wederkopes umme gebrekes unde behoff em andrepende; waerumme Wessel ergescreven dem erwerdighen heren, heren Gotzen, commendoer, offte synen nakamelinghe eder den convente hefft vorkofft 4 deymet meetlandes, beleghen yn Esclummer marke, voer eyn nomptlick gelt, alz 14 Rinsgulden, myt sodanen voerwoerden unde bescheyde, dat dyt erghescreven meetlant Wessel vor sick unde syne erven weder sal tho kope wezen yn allen tyden sunder argelyst voer sodane gelt, alz yn den ersten kope beroret is. Hir over hefft desulffte Wezel vorder vorkofft dem erwerdighen heren, heren Gotzen eder den convente eyn gres bowelandes, gheheten up den krummen ackeren, sunderlinx by junghe Howen lande upt suden unde he sulven upt noerden, sunderlinx voer 4 Rinsgulden, welker lant Wessel ergescreven offt synen erven weder sal tho kope wezen voer sodane gelt des ersten kopes sunder argelyst. Hyr an unde over synt gewezen tuchwerdighe mans, als meester Ludike Smeet, Gert Schulte. Noch yn merer bewyes der waerheit heb ick her Hermen myn yngesegel druckt upt spacium dusses breves. Anno Domini M^o CCCC^o XCVI^o, feria sexta post octavas sacramenti.

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	0828
Jaar	1496
Datumcode	VpoSacram

x

x

x

Commentaar	Aufgedrücktes Siegel verloren.

x

Edities	Editie naar dit exemplaar: oub1494.