Die Grafen Edzard I. und Uko von Ostfriesland verkaufen der Kommende Jemgum 100 Diemat neueingedeichten Landes bei Holtgaste.

Wy Edeszart unde Ukko, gebrodere, greven to Oestfriesslandt etc., bekennen mit desen unten openen bezegelden breve voir unss, unse erven unde alszweme, dat wy mit gueden weten unde willen hebben vurkofft, overgegeven unde upgedragen, vurkopen, geven over unde dregen upp eines vasten ewigen erffkopes in cracht deses breves deme convente sunte Johannssordenn inn Reiderlandt hundert demede landes van deme nyen waterlande nu geynnet, sick allernegest int norden unde west an de Holtgast streckende, alls wy demeselven convente de hebben laten affmeten unde uittekenen, voir vierdehalifhundert Rinsche gulden, de uns de werdige her Hayo, commenduer desselven cloisters, deger, all unde woll to unszer benoge den ersten pennyngck mit deme latesten vurnoget unde betailt hevet, unde dat genompte convent hir mede qwiteren fry, ledich unde loiss seggen, uns gueder betalinge bedancken; wowoll sodanne erve unde lande beter is dann de voirger. somme geldes, jedoch hebben wy sodans laten geschien dairumme, dat sodane hovetcloister to Jemghum mit den ersten sall werden gelacht, transfereret unde gebouwet to der Holtgast, dair nu dat voirwerck is, dair deme almechtigen Gade, aller hemmelschen herschafft unde sunte Johansze mit gueden vromen priesteren treuwelichen to denende; mit sodane vurder beschede, dat de heren sunte Johanssorden unde convent ergedacht nummermeer na desen dage gheen erve noch landt scholen noch willen anspreken offte to sick vordern in der nyer hammerick int norden unde west van der Holtgast gheynnet, offte de noch in anstainden tiden int sueden van der Holtgast bedyket offte gheynnet mochte werden, dann alle ore gerechticheit, ansprake unde eigendoem, de se dairan hebben ader krighen mogen, wo de ouck mochten syn, hebben de gedachte commenduer unde conventeskinder to Jemghum uns weder togelaten unde overgedregen, one gheen recht dairan to beholden, unde uns des by oren oversten guede wairschupp to donde, behalven sodane erve undt landt, als her Edezart, commenduer dairselves milder gedechtnisse, van heren Ulbede, abte to der Munthe, under data duesentvierhundert sess undetnegentich gekofft, belegen int sueden van der Holtgast, alls de koeppbrieff mit vyff anhangenden zegellen vursegellt deshalven gegeven wider vurmeldet, de in gueder vuller macht to sunte Johannes besten soll bliven, allet sunder argelist unde geveerde. Tho oirkunde der wairheit hebben wy Edezart, greve voirbenompt, van unser bruder wegen unse segell witlichen an desen brieff durch unszen secretarium heten hangen. Gegeven amme unszen slote Lerorde, imme jair unszes Heren duesent vierhundert sess undetnegentich, amme negesten saterdage na Petri ad vincula.

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	0812
Jaar	1496
Datumcode	SpVinPet

x

x

x

Commentaar	Anhängendes Siegel erhalten.

x

Edities	Editie naar dit exemplaar: oub1499.